”டொன்” லீ யின் பதுங்குகுழி

2009 ஆண்டு நிறைவு சிங்கை பதிவர் சந்திப்பு – 31.12.2009

2009-12-29T22:32:00.001+08:00

அன்புடையீர்…!

2009 ல் முதல் பதிவர் சந்திப்பை முதலில் வைத்த நாம், மறுபடியும் ஆண்டிறுதியில் கடைசி நாளில் சந்திக்கிறோம். ஆண்டின் ஆரம்பத்தில் ஒரு சந்திப்பில் கலந்து கொண்ட ஒரு முக்கிய பிரபலம், ஆண்டிறுதியில் நடக்கும் எமது இந்த சந்திப்புக்கும் வந்து கலந்து கொள்கிறார். அவர் வேறு யாருமல்ல, ”அழகிய சிங்கர்” என செல்லமாக அழைக்கப்படும் “அப்துல்லா” அண்ணர் அவர்கள்தான்.

(சிங்கரும் சிங்கமும்)

இடம்: Bishan Park, (Near Bishan MRT)

திகதி: வியாழன் 31.12.2009

நேரம்: மாலை 4 – 7 வரை

Google map link இங்கே.

Bishan MRT ல் இருந்து நடக்கும் தூரம். எப்படியும் முன்கூட்டியே செல்லும் ஜெகதீசனை தொடர்பு கொண்டு சரியான இடத்தை கண்டடையவும். மழைக்காலம் என்பதால் தகுந்த முன்னேற்பாடுகளுடன் வரவும்.

யாராவது Marina Bay Countdown க்கு செல்வதாக இருந்தால் அப்படியே 2010ன் முதல் சந்திப்பைக் கூட நடத்தலாம்.:-)

நன்றி…

தமிழ் பாட்டுப் பாடும் சிங்கை சீன மாணவர்

2009-10-22T21:33:00.001+08:00

சிங்கப்பூர் வசந்தம் ஸ்டார் நிகழ்ச்சி தெரிவுப்போட்டிகளின் போது கலந்துகொண்ட Darren என்ற சீன மாணவர் தமிழ் பாட்டுப்பாடி அசத்திய காட்சி. தன் இந்திய நண்பர்களுக்காக கலந்துகொண்டராம். அவரது (செல்ல)தமிழ்ப் பெயர் ”தனுஷ்”…

உதித் நாரயணனை விட நம்ம தனுஷுக்கு உச்சரிப்பு நல்லா வருது. தனுஷ் என்று செல்லப் பெயர் வைத்துக்கொண்டு அவர் பாடினது எல்லாம் சிம்புவோட பாட்டுக்கள்…:-)

Marriage Resume

2009-09-08T20:06:00.001+08:00

அந்நியன் படம் ஞாபகம் இருக்கா…? நம்ம ”நொந்தசாமி” விக்ரம் உருப்படியா நடிச்சு கொஞ்சாமாவது ஓடின படம். போய்ஸ்க்கு பிறகு சங்கர் இயக்கின படம், ஹாரிஸ் ஜெயராஜ் முதன்முதலாக சங்கருக்கு இசையமைத்த படம்…சரி அந்தப் படத்துக்கு என்ன இப்போ…?

அதில நம்ம அம்பி ராமானுஜ அய்யங்காரு தன் காதல் விண்ணப்பத்துக்காக உலக காதல் வரலாற்றிலேயே முதன்முறையாக Resume or CV ஒன்றை இணைத்து சாதனை பண்ணியிருப்பார். நாமும் அதை பகிடியாக எடுத்து சிரித்து பார்த்திருப்போம்.

அம்பி Resume எழுதுறார்…

Resume எழுதிய அம்பிக்கு நடந்தது இது தான்

நிற்க…

அண்மையில் வேலைவாய்ப்பு நிகழ்வுகள் (Caree talks, Networking Sessions) என் பல்கலைக்கழகத்தில் களைகட்ட ஆரம்பித்திருப்பதால், அதுவும் வங்கி சார்ந்த வேலைவாய்ப்புகளே அதிகம் வருவதால், என்னுடைய Resume க்கு கொஞ்சம் புது வடிவம் கொடுக்கலாம் என்று மாதிரி Resume Template களை Microsoft Word ல் தேடிக்கொண்டிருந்தேன் (Template section என்று ஒன்று தனியா இருக்கு…தெரியுமோ…?). அதில நிறைய specific ஆன Template மற்றும் samples இருக்கு. அவற்றை மேய்ந்து கொண்டிருக்கும் போது என் கண்ணில் பட்டது இந்த “Marriage Resume”.

என்னடா இது புது Resume ஆ இருக்கே என்று தரவிறக்கம் செய்து பார்த்தால், எழுதியிருப்பது ஒரு இந்திய வடநாட்டு வாலா…

அந்த Template ஐ தரவிறக்க இணைப்பு இதோ

நம்ம அம்பி Resume எழுதினது போல கன ஆக்கள் இப்படியும் resume எழுதி இருக்கினம் போல. இது பற்றி பலருக்கும் பல அனுபவங்கள் இருக்கலாம். அதை இங்கே பகிர்ந்தால் என்னைப் போன்ற பல இளைஞர்கள் பெரும் பயனடைவர்…

ஐரோப்பிய திக்விஜயம் V – Oslo நகர்வலம்

2009-08-09T23:25:00.001+08:00

Oslo City Hall, (மணிக்கூட்டில் நேரத்தை கவனிக்க, இரவு 9 மணி)

Oslo (ஒஸ்லோ), நோர்வே நாட்டின் தலைநகர். ஆயிரம் ஆண்டுகளுக்கு மேற்பட்ட புராதன நகர் என்று வரலாறு கூறுகின்றது. Oslofjord எனும் Fjords களின் ஊடாக அமைந்திருக்கும் கடலோரத்தில் மலைகளுக்கு நடுவே, அழகான துறைமுக நகரம் இது. பழமை மாறாமல், அதேவேளை எல்லை மீறாமல் நவீனத்தையும் கலந்து நகரை கட்டியெழுப்பி உள்ளார்கள்.

கடலோர நகர் உலா, இரவு 10 மணி, சூரிய அஸ்தமனம் ஆரம்பமாகின்றது

அழகழகான கப்பல்கள், சொகுசுப் படகுகள், புராதன படகுகள், படகு உணவகங்கள்,புராதன கோட்டை, கடலின் நடுவே அமைந்த தீவுகள், கரையோரமாக அமைந்த உணவு விடுதிகள், உல்லாச தளங்கள் ஒரு தலை நகருக்கு உரிய அத்தனை விடயங்களையும் தன்னகத்தே கொண்டுள்ளது. Fjord இடையான கடல் நீரேரியில் அமைந்த குட்டி குட்டி தீவுகள் தலை நகருக்கும் மேன் மேலும் அழகு சேர்க்கின்றன. ஐரோப்பிய நகரங்களுக்கே உரிய கலைநயம் மிக்க கட்டடங்கள், வானை மிர(மு)ட்டாத உயரத்தில் பழமையும் புதுமையும் கலந்து மிளிர்கின்றன. நகரத்தெருக்களில் எல்லை மீறாத கூட்டம், விதவிதமான கலை நிழச்சிகள் செய்து மகிழ்விக்கும் கலைஞர்கள், ஓவியம் தீட்டும் ஓவியர்கள், (என்னைப் போன்ற)சுற்றுலா பயணிகள், காதல் ஜோடிகள், பல்லின மக்கள், ஒஸ்லோவை மேன்மேலும் அழகாகக் காட்டுகின்றன.

இரவு நேர களியாட்டங்கள் கரையில் மட்டுமல்ல, கடலிலும் தான். படகுகளை நாம் வாடகைக்கு எடுத்துக்கொண்டு செல்லலாம். ஆடலாம், பாடலாம்.

அப்படியே ஒஸ்லோவில் இருக்கும் முக்கியமான இடங்களையும் பார்த்துவிடுவம்.

Nobel Peace Centre, Norway Parliament, Royal Palace,

கலை நிகழ்ச்சிகள், விளையாட்டுகள், இசை நிகழ்ச்சிகள்…களை(லை) கட்டுகின்றது

லத்தீன் அமெரிக்க ஓவியரின் கைவண்ணம் (நம் கண்முன்னே கீறித்தள்ளுகிறார் Spray paint), இத்தாலி சைக்கிள் நாட்டவரின் சாகசங்கள், அமேசன் இந்தியர்களின் பாரம்பரிய இசை, முப்பரிமாண முகம்.

ஒஸ்ரேலியாவில் சிட்னி நகரில் கடற்கரையில் அமைக்கப்பட்ட பிரபல Opera House ஐ பின்பற்றி, ஒஸ்லோவிலும் Opera house ஒன்று உள்ளது. OPERAN என்று அழைக்கப்படும் இது கப்பலின் வடிவில் பளிங்கு கற்களால் அமைக்கப்பட்டுள்ளது. கடலில் இருந்து பார்க்கும் போது கப்பல் போல் தெரிந்து பார்ப்பவர் கண்களை ஏமாற்றும்.

Oslo opera house, மற்றும் அதனிலிருந்து கடல், நகர் இனை நோக்கி சுட்ட படங்கள்

சரி, தரையில் பார்க்கவேண்டியதெல்லாம் பார்த்தாச்சு. அடுத்ததாக கடற்பயணம். ஒஸ்லோ தீவுக்கூட்டங்கள், மற்றும் Oslofjorden இடையே பயணம் செய்ய படகு இருக்கின்றது. அதில் ஏறினால் ஒரு ஜாலி கடற்பயணமும் மேற்கொள்ளலாம்.

கடலிலிருந்து நகரின் தோற்றம், அழகான கப்பல் (கப்பல் மட்டுமா…?) போகும் வழியில் தீவுக்கூட்டங்கள்

எல்லா இடங்களையும் நான் ஒரே நாளில் செல்லவில்லை. வெவ்வேறு நாட்களில் அதுவும் வெவ்வேறான காலநிலைகளில் சென்றிருப்பதை படங்களில் இருந்து அவதானித்திருப்பீர்கள். கிட்டத்தட்ட என் விடுமுறையின் முதல் 10 நாட்களும் நல்ல வெயில், கப்பற்பயணம் மேற்கொண்டது அப்போது தான். அதன் பின் சற்று மழைக் காலம். எப்போது மேகக்கூட்டமும், குளிர்காற்றும், சிலவேளைகளில் மழையும். எனவே காலநிலையைப் பொறுத்தே வெளிக்கிட வேண்டிய கட்டாயம். Oslo நகர் பகுதிக்கு அவ்வப்போது வந்து போவதால், நேரம் கிடைக்கும் நேரங்களில் நகர் வலம் வருவது வழக்கம்.

சரி. ஒஸ்லோ நகர்வலத்தை இத்துடன் நிறுத்திக்கொண்டு, இன்னொரு இடத்துக்கு போவம், அது என்ன…? Drammen, மற்றும் Kongsberg. வெகுவிரைவில்…

ஐரோப்பிய திக்விஜயம் IV – Norway ஒரு அறிமுகம்

2009-08-03T10:41:00.001+08:00

9.00 AM, June 24, 2009, Skedsmo, Norway

ஒஸ்லோவிலிருந்து 20 நிமிட கார் பிரயாண தூரத்தில் அமைந்த அழகான கிராமம். வரிசை வரிசையாக அழகான வீடுகள். கூடவே கார் தரிப்பிடங்களும். வெளியே வெயில் எரிந்து கொண்டிருந்தது. வீட்டு சன்னலிருந்த காட்டி வெப்பநிலை 24 C என்று காட்டியது. மலைப்பிராந்தியங்களுக்கே உரிய இலேசான குளிர் காற்று சற்றே சில்லிட வைத்தது. ஆக மொத்ததில் இந்த காலநிலை, இந்த புதிய நாடு, எல்லாம் எனக்கும் பிடித்திருந்தது. பால் கோப்பியுடன் சுடுபாணை சுவைத்தவாறே நோர்வேயை அனுபவிக்க தொடங்கினேன்.

சொந்த பந்தங்களுக்கு தொலைபேசியில் அழைத்து கதைத்து, சுகங்களை பரிமாறி, களைத்துப் போய், வெளியே காரில் பக்கத்து நகருக்கு ஒரு உலாப் போய் நோர்வேக் காரர்களின் பரவலான “ஹாய்” களுக்கு பதில் “ஹாய்” க்களை தந்துகொண்டு கடைகளை வலம் வந்தேன். நான் மட்டுமல்ல, பலரும் இந்த இதமான காலைநிலையை வரவேற்க “கறுப்பு கண்ணாடிகளுடனும் மெலிதான ஆடைகளுடனும்” தென்பட்டனர்.

இலங்கையில் பாடபுத்தகங்களில் “நள்ளிரவில் சூரியன் உதயமாகும் நாடு” என்று நோர்வே எங்களுக்கு அறிமுகப்படுத்தப்பட்டது (இப்ப அறிமுகமே தேவையில்லை என்று நினைக்கிறேன். அந்த அளவுக்கு…). அப்போது எங்களுக்கெல்லாம் மிகப்பெரிய ஆச்சரியம். பூகோள அமைப்பு அவ்வளவாக விளங்காத வயது அது. துருவப் பகுதிக்கு மிக அண்மையில் இருக்கும் ஸ்கண்டினேவிய நாடுகளான நோர்வே, சுவீடன், பின்லாந்து, கிரீன்லாந்து, ரஷ்யாவின் மேற்பகுதி போன்றவை கோடை காலத்தில் சூரியனுக்கு மிக அண்மையாக வருபவை. (புவி அச்சு 23 பாகை சரிந்திருப்பதை கவனத்தில் கொள்க).

இடது பக்க கீழ் மூலை (Bottom Left)பூமியின் நிலையில் ஐரோப்பா கண்டம் கோடைகாலத்தை அனுபவிக்கும்.

எனவே கோடைகாலங்களில் புவிச்சுழற்சியின் போது இந்தப் பகுதிகள் அதிகளவு நேரம் சூரிய வெளிச்சத்தை பெறுகின்றன. வடக்கு நோர்வே போன்ற பகுதிகளில் நள்ளிரவில் சூரியனை காணமுடியும். மற்ற பகுதிகளில் சூரிய உதயம், மறைவு என்று அதிகாலை 4 மணிக்கெல்லாம் வட கிழக்கு திசையில் சூரிய உதயத்தையும், இரவு 10 மணிக்கு மேலாக வட மேற்கு திசையுல் சூரிய மறைவையும் காணலாம். உச்சிக்கு சூரியன் வருவது என்பது எப்பவுமே கிடையாது.

நள்ளிரவு சூரியன், கூடவே சூரியனின் பாதையை கவனிக்கவும். இது அஞ்சல் அட்டைப் படம் ஆகும். (நன்றி Flickr)

அப்படியே கொஞ்சம் நோர்வே நாட்டின் வரலாற்றையும் சுருக்கமாகப் பார்ப்போம். ஆரம்பகால வைகிங்குகள், கிறிஸ்தவ இராச்சியம், பின் டென்மார்க்குடன் இணைப்பு, பின் சுவீடனுடன் இணைப்பு, சுவீடன் மன்னருக்கு கீழ் தனி அலகு, என்று பல ஆயிரமாண்டுகளாக நீழும் நோர்வே நாடு 1905 ல் பூரண சுதந்திர நாடானது. மற்றைய ஐரோப்பிய நாடுகள் போல் இங்கு பெயரளவில் கெளரவத்துக்காக அரசபரம்பரையும் இருக்கின்றது. 2 வது உலக யுத்தத்தில் நடு நிலைமை வகித்த நோர்வே பின் நேட்டோ அமைப்பு உருவாகுவதில் முக்கிய பங்கு வகித்தது. ஐரோப்பிய ஒன்றியத்தில் இணைய இரு தடவைகள் கருத்து வாக்களிப்பு மூலம் மறுத்தது. செங்கன் (Schengen) எனப்படும் எல்லைகளற்ற நாடுகள் அமைப்பில் இதுவும் ஒன்று.

(Sámi ) எனும் பூர்வீக குடிகள் அடங்கலான நோர்வீஜியர்கள் தான் பெரும்பான்மை இனத்தவர். பிற ஐரோப்பியர்களுடன், துருக்கி, சோமாலியா, பாகிஸ்தான், இலங்கை நாட்டு குடியேற்றவாசிகளும் சிறுபான்மைக்குள் அடங்குவர். Bokmal, Nynorsk என்பவை உத்தியோகபூர்வ மொழிகள். பெற்றோலியம், எரிவாயு, கனிமங்கள், மற்றும் மீன்பிடித்துறை போன்றவற்றில் பொருளாதாரம் தங்கியுள்ளது. வாழ்வதற்கு சிறந்த நாடுகள் பட்டியலில் இடம்பிடிக்கும் நோர்வே, மக்கள் நலன், கல்வி போன்றவற்றில் விசேட கவனம் செலுத்துகின்றது.

மலையும் மலை சார்ந்த நாடான நோர்வேயில் காலநிலை கொஞ்சம் சிக்கலானது தான். வருடத்தில் 9 மாதங்கள் வரை குளிர், பனி, என்று மோசமான நிலமை நிலவும். ஜூன் – ஜூலை கோடை காலத்தில் வெயிலை பார்க்கலாம். விவசாய நடவடிக்கைகளை இந்த மாதத்துக்குள் செய்து முடிக்க வேண்டும். செப்டெம்பரில் இலையுதிர்காலம் தொடங்கிவிடும். டிசெம்பரில் பனி பொழியவும் தொடங்கும்.

மலைநாடான நோர்வேக்கு இயற்கை தந்த அழகிய அருங்கொடை Fjords (Fjords are formed when a glacier cuts a U-shaped valley by abrasion of the surrounding bedrock. Many such valleys were formed during the recent ice age. Source Wiki). மலைகளுக்கிடையான பள்ளத்தாக்கில் நீண்ட நீர்த்தேக்கங்கள். அருகிலிருக்கும் கடலினும் ஆழமான இவை Ice Age எனப்படும் காலத்தில் படிப்படியாக உருவாகியதாக (பனி உருகல்…?) கூறப்படுகின்றது. நோர்வே முழுவதை இவற்றை பரவலாகக் காணலாம். இவற்றில் சில ஐநா வின் புராதன சின்னங்கள் பட்டியலிலும் இடம்பெற்று உள்ளன.

5 வாரகால திக்விஜயத்தில் முடிந்தளவுக்கு இடங்களை சுற்றி பார்த்துள்ளேன். கொஞ்சம் கொஞ்சமாக அவை ஒவ்வொன்றும் பற்றியும் விரிவாக அழகாக அடுத்தடுத்த பதிவுகளில் பார்ப்போம்.

தொடர்ந்து இணைந்திருங்கள்…

ஐரோப்பிய திக்விஜயம் III – Welcome to Norway

2009-07-04T17:42:00.002+08:00

24.06.2009, காலை 6.50 , Oslo Airport, Gardermoen

வெளியே கொளுத்துகின்ற வெயிலின் தாக்கம் குளிரூட்டியையும் தாண்டி விமானத்தினுள் தெரிந்தது. 28 பாகை செல்சியஸாக இருக்கலாம். இந்த காலைப் பொழுதில் இப்படி ஒரு வெயிலை நான் அனுபவித்ததே இல்லை. திட்டமிடப்பட்ட நேரத்துக்கு 10 நிமிடங்கள் முன்பாக விமானம் தரையிறங்கியதால், Gate இன்னமும் தயாராகவில்லை. ஆதலால் விமான ஓடுபாதையில் வெயிலில் காத்திருக்கின்றோம். 11 மணித்தியால பயணம் எனக்கு எந்த ஒரு களைப்பையும் தரவில்லை.

ஒஸ்லோ விமான நிலையம் (படங்கள் Wiki photos, www.osl.no)

பாங்கொங்கிலிருந்து வெளிக்கிட்டது முதல் பயணம் இனிதே அமைந்தது. வழமை போல் அழகான விமான மகளிர், அருமையான சாப்பாடு, on board entertainment ல் நல்ல படங்கள் என்று எல்லாமே அழகாக அமைந்தது. தாய் பாணி கோழிக்கறியை ருசித்த வண்ணம் “Pink Panther 2” படம் பார்த்தேன். அது முடிந்ததும் “Twilight” பார்க்க வெளிக்கிடும் போது கண்கள் மெல்ல சுழலத்தொடங்கின. Kristine Stewart ன் உதட்டுச்சுழிப்பை கூட ரசிக்க மறந்து தூக்கம் கண்களை தழுவியது. அடுத்த இருக்கை வெறுமையாக இருந்ததால், சாய்ந்து படுக்க வாய்ப்பு கிட்டியது. உடலை சற்றே சாய்த்தும், கால்களை இலகுவாக விட்டும் முடங்கினேன். உடலுக்கு இலகுவாக இல்லாமையால் அடிக்கடி எழும்பி திரும்பி படுக்க வேண்டியதாகிவிட்டது. எனக்கு முன்னால் இருந்த ஒருவர் வித்தியாசமான (கா. சூ) தோற்றங்களில் படுத்து பீதியை கிளப்பினார்.

பாங்கொக் நேரம் காலை 6.30. இதற்கு மேல் நித்திரை கொள்ள முடியவில்லை. சோம்பல் முறித்து முகம் கழுவி விட்டு வந்து சன்னல் திரையை நீக்கினால், வெளியே பிரகாசமான சூரிய வெளிச்சம். தொலைக்காட்சி திரையை உயிர்ப்பித்தால், நாம் வட ரஷ்யாவுக்கு மேலாக பறந்து கொண்டிருந்தோம். கோடைகாலங்களில் வட துருவ பகுதிகள் நேரடியாக சூரியனின் அதீத கவனிப்பில் வருவதால் சூரியோதயங்கள் அதிகாலை 4 மணிக்கெல்லாம் நடந்துவிடும். அதேபோல் நாளில் அதிகமணிநேரம் (18 – 20 மணிநேரம்) சூரிய வெளிச்சம் இருக்கும். எனவே சிங்கையிலும் பாங்கொக்கிலும் ஒஸ்லோவிலும் ஒரே நேரம் சூரிய உதயம் நிகழும் எனலாம்.

சன்னல் திரையை மூடிவிட்டு நான் பாதியில் விட்ட Kristine Stewart ன் “Twilight” ஐ தொடர்ந்தேன். விமானத்தில் பலரும் இன்னமும் எழும்பவில்லை. பாங்கொக் நேரம் 10 மணியாக இருக்கும் போது விமானம் சுவீடன் வான்வெளியினுள் நுழைந்தது. விமான மகளிர் காலை உணவுடன் அனைவரையும் எழுப்ப தொடங்கினர். விமானம் தரையிறங்க இன்னமும் ஒரு மணிநேரத்துக்கு சற்று கூடுதலாக மட்டும் இருப்பதால் அனைவரும் துரித கதியில் தம்மை தயார் படுத்த தொடங்கினர்.

வானில் இருந்து பார்க்கையில் ஒஸ்லோ விமான நிலையம் (படம் www.osl.no)

விமானம் நோர்வே வான்வெளியில் நுழைந்தது. கொஞ்சம் கொஞ்சமாக தாழத் தொடங்கிய விமானத்திலிருந்து நோர்வேயின் அழகிய மலைபாங்கான நிலப்பரப்புக்களை கண்டு ரசிக்க முடிந்தது. சிங்கை பாங்கொக் பயணம் போல் இறுதி அரைமணியில் விமான மகளிர் பாரம்பரிய உடையிலிருந்து நாகரிக மேற்கத்தைய உடைக்கு மாறினர்.

10 நிமிட ஓடுபாதை காத்திருப்பு முடிந்தது, கூடவே பிளாஷ்பேக்கும். விமானம் நமக்கான gate ஐ நோக்கி மெல்ல ஊர்ந்து செல்ல தொடங்கியது. ஒஸ்லோ விமானநிலையம் சிங்கை, பாங்கொக், ஹொங்ஹொங் போன்று பெரியதோ இல்லை பரபரப்பானதோ இல்லையென்றாலும் மலைகளின் பிண்ணனியில் அழகான அமைதியான இடத்தில் அமைந்திருந்தது.

தாய் விமான மகளிரின் ”sa-wat-dee” களை ஏற்றுக்கொண்டு விமானத்தில் இருந்து இறங்கினோம். குடிவரவுச்சாவடியில் இரண்டு வரிசைகள் மட்டும் இருந்தன. ஐரோப்பிய யூனியன் மற்றும் நோர்விஜிய வாசிகளுக்கு ஒரு வரிசையும் மற்ற நாட்டவர்களுக்கு இன்னொரு வரிசையும். மற்ற நாட்டவர் வரிசை வழமை போல் நீளம் கூட, மெதுவாக வேற நகர்ந்தது.

அரை மணிநேரம் கடந்தது. ஒருமாதிரி வரிசை நகர்ந்து என் முறை வந்தது. என் கடவுச்சீட்டையும் மற்றைய ஆவணங்களையும் அலுவலர் முன்வைத்து

“Hi…”

அவர் என் கடவுச்சீட்டை எடுத்துப் பார்த்துவிட்டு, எச்சரிக்கையடைந்து

“Oh…You are from Sri Lanka…?”

என் நிலை விளக்கம் கொடுக்கவேண்டிய நேரம் இது.

“Ye, I’m a Sri Lankan passport holder. But I’m from Singapore. I’m a permanent resident there. I came here to visit my family. I plan to stay here for 5 weeks”

அவராகவே முழுவிபரங்களையும் கேட்குமுன் நானே சொல்லிவிட்டேன். நான் சொன்ன விபரங்களை ஒவ்வொன்றாக கடவுச்சீட்டில் சரிபார்த்தார். என் கடவுச்சீட்டு படத்தைப் பார்த்த அவர் சிரித்தவாறே தலை நிமிர்ந்தார்.

“Oh no…Where’s your mustache..?”

நானும் சிரித்தவாறே “I left that in Singapore.”

பலமாக சிரித்த அவர் “Well, Can I have a look at your tickets?”

“Ye, sure” பயணச்சீட்டை அவரிடம் நீட்டினேன்.

“Ok. You will be leaving on….ye let me check…”

“27^th July”

என் பயணச்சீட்டை மறுபடியும் சரி பார்த்த அவர், குடிவரவு இலச்சினையை என் கடவுச்சீட்டில் பதித்தார். சகல ஆவணங்களையும் என்னிடம் திருப்பித் தந்த அவர்,

“Enjoy your stay…”

“Thank you…, Bye…” விடைபெற்றுக்கொண்டேன்.

பெரிய பிக்கல் பிடுங்கலின்றி குடிவரவு பணிகள் முடிந்தது.

பயணப் பொதிகள் வைத்திருக்கும் Arrival பகுதியை நோக்கி விரைந்தேன். எனக்கு முன்பே அவை வந்தடைந்து எனக்காக தனிமையில் காத்திருந்தன. அவற்றை எடுத்துக்கொண்டு வரியற்ற கடையில் “Famous Groose” ஐ வாங்கிக்கொண்டு வெளியேறினேன்.

இதமான குளிர், இளஞ்சூடான வெயில் என்று மலைநாடான நோர்வே என்னை வரவேற்க தொடங்கியிருந்தது. வாகனங்களில் இடதுபுறமும் தெருக்களில் வலது புறமும் என்று Driving. நம் நாட்டுக்கு தலைகீழ். தெருக்கள் அதிக ஆராவாரம் இன்றி அமைதியாக அழகாக இருந்தது.

என் திக்விஜயம் வெற்றிகரமாக ஐரோப்பிய மண்ணில் தொடங்கியது…

(திக்விஜயம் தொடரும் …)

ஐரோப்பிய திக்விஜயம் II – Transit @Bangkok

2009-07-01T03:49:00.001+08:00

23.06.2009, இரவு 9.50 பாங்கொங் சுவர்ணபூமி விமானநிலையம்

கொஞ்சம் கொஞ்சமாக கீழிறங்கிக் கொண்டிருந்த விமானத்தில் இருந்து வெளியே தெரிந்த அழகுக்காட்சிகளை ரசித்துக் கொண்டிருந்தேன். இன்னும் சில நிமிடங்களில் விமானம் பாங்கொங் சுவர்ணபூமி விமானநிலையத்தை அடைந்து விடும். போரடித்த விமானப்பயணங்களில் இதுவும் ஒன்று.ஏர் ஆண்டி(இந்தி)யாவில் சென்னை சென்ற பயணம் தான் செமபோர். தாய் விமான பணிப்பெண்களை சைட் அடித்ததை தவிர வேறு எதுவும் உருப்படியா இல்லை. சாப்பாடு, தாய் பாணியிலும் இல்லாமல், சிங்கை பாணியிலும் இல்லாமல் என் நண்பர்கள் சமைச்சதைப் போல் உப்புச்சப்பில்லாமல் இருந்தது. பாரம்பரிய உடையில் இருந்த தாய் விமான பணிபெண்கள் விமானம் தரை இறங்க அரை மணி முன் நாகரீக மேற்கத்தைய உடைக்கு மாறி ஆச்சரியம் அளித்தனர். 2 மணி நேர பயணத்துக்கு ஏன் இந்த உடை மாற்றம்? தெரியவில்லை.

விமானம் தரையிறங்கியது. பாக்கொங் நேரம் சிங்கை நேரத்திலும் 1 மணிநேரம் குறைவு. Transit பகுதியை நோக்கி நான் நடக்கதொடங்கினேன். வழியில் தெரிந்த இலத்திரனியல் அறிவிப்பு பலகையில் எனது boarding gate ஐ அறிந்து கொண்டு நடந்தேன். வழியில் தெரிந்த வரியில்லா கடைகளில் சும்மா உலாத்தி விலை பார்த்தேன். இலாபகரமாக தான் இருக்கு. திரும்பி வரும் போது ஒரு கை பார்க்க வேணும்.

நடக்கும் போது வழியில் பல தாய் கலாச்சார அலங்காரங்கள் வைக்கப்பட்டிருந்தன. அதில் என் கவனத்தை ஈர்த்தது இது தான். பாம்பும், இருபக்கமும் ஆக்கள் நின்று இழுப்பது எதையோ ஞாபகப்படுத்த அருகே சென்று குறிப்பிட்டிருந்த விபரத்தை பார்த்தேன். “பாற்கடலில் தேவர்களும் அசுரர்களும் அமிர்தம் கடைஞ்ச சம்பவம் தான்” அது.

Boarding Gate இன்னும் திறக்கவில்லை. சும்மா வெளியே பராக்கு பார்த்துக்கொண்டிருந்தேன். இரு சுவிடிஷ் இளைஞர்கள் ”wana drink..?” கோலாவை நீட்டினார்கள். நான் நன்றியுடன் மறுத்துவிட்டு நகர்ந்தேன்.

இரவு 11.35, Boarding gate திறந்து விட உள்ளே சென்றேன். பாதுகாப்பு சோதனைகள் கடுமையாக இருந்தன.

உள்ளே இருந்த அதிகாரியிடம் என் கடவுச்சீட்டையும் Boarding Pass ஐயும் நீட்ட, முகம் மலர்ந்தார். என்னை இன்னொரு அதிகாரி வந்து அழைத்து சென்றார். என்னை தான் ரொம்ப நேரமா எதிர்பார்த்துக் கொண்டிருந்தனர் போல்.

“Mister, you are from Sri Lanka…?”

“No, I’m from Singapore, permanent resident there; I’m on my way to Oslo”

என்னுடைய boarding pass இரண்டையும் திருப்பிப் பார்த்த அவர்“Can you show me your Singapore IC..?”

எடுத்துக் காட்டினேன். எனக்கு அடிக்கடி பாதுகாப்பு தருவது அது மட்டும் தான்.

“What you are doing there?”

“I’m studying there”

“How long you have been there?”

“6 years”

என்னுடைய கடவுச்சீட்டு படத்தை பார்த்த அவர், சிரித்தவாறே “You look younger now, ye this passport is taken 7 years back”

“Ye..”, நானும் ஆத்திரத்துடன் சிரிக்க முயன்றேன்.

“Ok, mister that’s all..” எனது கடவுச்சீட்டையும் Boarding Pass களையும் திருப்பி தந்தார்.

அவர்களை சொல்லி குற்றமில்லை. என்னை சொல்லி குற்றமில்லை. யாரையும் சொல்லியும் குற்றமில்லை. இதெல்லாம் பழகிடுச்சு.

அவ்வளவா கூட்டமில்லை. முக்கால்வாசி நோர்டிக்/நோர்விஜியர்கள், மிச்சம் தாய் நாட்டவர், இரண்டு இந்தியர்கள், மற்றும் நான்.

நள்ளிரவு 12 மணி, Boarding ஆரம்பமானது. மறுபடியும் ஒரு அழகு மங்கை திருவாய் மலர்ந்தருளினார்

“sa-wat-dee”

இம்முறை விமானத்தில் வசதிகள் அருமை. Onboard Entertainment வசதிகள் எல்லாம் இருந்தது. வழமை போல் அழகு மங்கைகளும் அதிகம். பயணிகள் எண்ணிக்கை குறைவாதலால் பலர் நடு இருக்கைகளை கைப்பற்றி படுக்கைகளை தயார் செய்து கொண்டிருந்தனர். எனக்கு பக்கத்து இருக்கை காரர் இப்படி இடம் பெயர்ந்து விட்டதால், நான் சன்னல் பக்கமாக இரு இருக்கைகளில் ஜாலியாக இருக்க முடிந்தது.

புதன்கிழமை 24.06.2009, நள்ளிரவு 12.35, நம் திக்விஜயத்தின் உண்மையான பயணம் ஆரம்பமாகின்றது. இது ஒரு நெடிய இரவுப் பயணம்

பயணங்கள் முடிவதில்லை. ஆகவே தொடரும்…..

ஜெய வீபவ.

(பி.கு: என்னடா ஐரோப்பிய திக் விஜயம் என்று போட்டிட்டு, பிளேன் ஏறினதையும் இறங்கினதையும் எழுதிட்டு இருக்கான் இந்த லூசுப் பயல் என்று அலுத்துக்க வேண்டாம். அடுத்த பகுதியில் ஒஸ்லோ வந்திடுவம். பயம் வேண்டாம்)

ஐரோப்பிய திக்விஜயம் I

2009-06-29T16:22:00.001+08:00

23.06.2009, பின்னேரம் 4.45, சிங்கப்பூர்

“Uncle, Changi Airport…?”

ராக்ஸி டேர்மினல் 1 ஐ நோக்கி விரைந்து கொண்டிருந்தது. 4 வருடங்களுக்கு பின் நான் மேற்கொள்ளும் விமானப் பயணம். சிங்கப்பூருக்கே உரித்த மப்பும் மந்தாரமுமான வானம், ஆனால் மழை பெய்யாது. விரைவுச்சாலையில் வாகனங்கள் எண்ணிக்கை கூடிக்கொண்டே இருந்தது. இன்னும் சில நிமிடங்களில் நெரிசல் நேரம் ஆரம்பிக்க கூடும். அதற்கிடையில் நாம் விமான நிலையத்தை அடைந்திருந்தோம்.

“Thank you…”, ஓட்டுனருக்கு நன்றி தெரிவித்து விடைபெற்றுக்கொண்டேன். Check in நடைமுறைகள் இனிதே முடிவுற, Boarding pass, luggage tags போன்றவற்றை சரி பார்த்துக்கொண்டு, veiwing mall ல் போய் இருக்கும் போது 6 மணியாகிவிட்டிருந்தது. சாங்கி விமானநிலையம் வழமை போல் பரபரப்பாக இருந்தது. உலகின் சிறந்த விமான நிலையங்களில் ஒன்றல்லவா…?

ரொம்பவே ஓய்வெடுத்து களைத்துப் போய்விட்டதால், சற்று நேரம் உலாத்தினேன். அப்படியே அழகிய விமானப் பணிப்பெண்கள் பலரையும் சைட் அடித்து தார்மீகக் கடமையை நிறைவேற்றிக் கொண்டிருக்கும் போது இரவு 7.30 ஆகிவிட்டிருந்தது. எனது விமானத்துக்கான Boarding gate திறந்து விட்டிருந்தது. சிங்கையிலிருந்து முதன் முறையாக CHANNEL B க்கால் செல்லாமல், நேரடியாக குடியகல்வு சாவடிக்குள் நுழைகிறேன். (CHANNEL B ,மேலதிக பாதுகாப்பு சோதனைகளுக்காக, சில நாட்டு விமானங்களில் பயணிப்பவர்கள் செல்ல வேண்டும்). சிங்கை நிரந்தரவாசியாகையால் குடியகல்வு சாவடியில் எனக்கு ஒரு பிரச்சினையும் இல்லை. வரியற்ற கடைப்பக்கம் சும்மா உலாத்தி விட்டு, Gate D41 ஐ நோக்கி நடக்கத்தொடங்கினேன்.

“Are you going Bangkok..?”

“Ye, it’s my transit, I’m going Oslo..”

என்னுடைய 2 boarding passes ஐயும் பரிசோதித்த அதிகாரி, என் கடவுச்சீட்டில் விசாவை தேடினார்.

“It’s on page 19”

என் கடவுச்சீட்டு படத்தையும் என்னையும் திரும்பி திரும்பி பார்த்த அவர்,

“You looks younger now…”சிரித்தார். கடவுச்சீட்டு படத்தில் மீசையுடன் (பயங்கரமாக) இருப்பேன்.

“Thank you sir, have a nice trip.”

தாய்லாந்து வழமையான சுற்றுலாதளமாகையால் கனபேர், அதோட என்ன மாதிரி Transit ஆக்களும். ஸ்கண்டினேவிய நாடுகளுக்கு thai air இன் கட்டணங்கள் இலாபகரமானவை.

இரவு 8 மணி போல் Boarding ஆரம்பமானது.

“sa-wat-dee”

(இது svasti எனும் சமஸ்கிருத சொல்லில் இருந்து மருவியதாக வீக்கியாண்டவர் சொல்கின்றார்).

அழகிய தாய் விமான மகளிர் த(ந)ம் கலாச்சார பாணியில் கை கூப்பி தலை சாய்த்து வணக்கம் தெரிவித்து வரவேற்றனர். அவர்களை தவிர மிச்ச ஒண்டும் உள்ளே உருப்படியா இல்லை. on board entertainment வசதிகள் ஒன்றுமே இல்லை.

இரவு 8.40, எம் விமானம் ஓடுபாதையில் ஊர்ந்து செல்ல தொடங்கியது. வழமையான பாதுகாப்பு நடைமுறைகள் சொல்லப்பட்டு முடிகையில் விமானம் மேலெழும்ப தயாரானது. எம் திக்விஜயமும் ஆரம்பமானது.

ஜெய வீபவ……

சிங்கை பதிவர் ஒன்று கூடல் அறிக்கை 20.06.2009

2009-06-21T12:38:00.002+08:00

அலுவலக பணி நிமித்தம் தான் சிங்கை வருவதாக லோஷன் அண்ணா மடல் அனுப்பியிருந்தார். மகிழ்ச்சி தெரிவித்த நான் அப்படியே நம்ம பதிவர் சுற்றத்தையும் சந்திக்க விரும்புகிறீர்களா என்று பதில் மடல் அனுப்ப, அவரும் சம்மதம் தெரிவிக்க, உடனடியாக நம் சுற்றத்துக்கு தகவல் தரப்பட, இந்த ஒன்று கூடல் திட்டமிடப்பட்டது. சிங்கை வந்ததும் லோஷன் அண்ணா என்னை தொடர்பு கொண்டார். சுகங்கள் விசாரித்து விட்டு சந்திப்பு பற்றிய முழு விபரங்களை அவருக்கு தெரிவித்தேன். மகிழ்ச்சியுடன் ஏற்றுக்கொண்டார்.

சனிக்கிழமை, அவர் இருக்கும் இடத்துக்கு அண்மையிலான தொடரூந்து நிலையம் சென்று அவரை எதிர்கொண்டேன். கல்லூரிக் காலங்களில் மாணவர் தலைவராகவும், பின் வானொலி, தொலைக்காட்சி என்று ஊடகங்களில் ஒரு பிரபல அறிவிப்பாளராகவும் பார்த்த அவரை ஒரு நண்பராக/பதிவராக இன்று தான் முதல் முறையாக சந்திக்கிறேன். கூடவே சிங்கையில் இருக்கும் இன்னொரு இலங்கை தமிழ் பதிவர் நண்பர் கதியால் (கிடுகுவேலி எனும் வலைப்பூ) எனும் விசாகனும் இணைந்து கொள்ள, நாம் சந்திப்பு நடக்கும் இடத்தை நோக்கி பயணமானோம்.

இந்தப் படகுகளில் பதிவர்கள் யாருமே இல்லை. ஆனால் பறவைகள் உண்டு

KALLANG MRT ல் அப்பாவி முருகேசன், சரவணன், “பித்தன்” விஜய் ஆகியோர் தென்பட்டனர். அறிமுகங்கள் நடந்தன. ஜெகதீசனை தொடர்பு கொண்டு இடத்தை உறுதி செய்து விட்டு, நகர்ந்தோம். ஜெகதீசனுடன் முகவை இராமும் இருந்தார். ஆற்றின் இக்கரையில் வெயிலின் கொடுமை அதிகமாக இருக்க, இக்கரைக்கு அக்கரை பச்சையாக/பசுமையாக தெரிய, ஆற்றைக் கடந்தோம். நீந்தி அல்ல, பாலத்தை நடந்து கடந்தோம்.

”இப்படியே ஆளுக்காள் பேசாமல் இருந்தா எப்படி…?”

“எங்கேயா நாட்டாமை…? எங்கேயா சொம்பு…?”

ஜோதிபாரதி, ஞானசேகரன் ஆகியோரும் வந்து சேர, ஒரு மாதிரியாக ஆற்றங்கரை ஓரமாக தென்னை மர நிழலில் நிலத்தில் உட்கார்ந்தோம். கோவியார், மற்றும் நம்ம ஜோசப் அண்ணர் இருவரும் இன்னமும் வராததால் அந்த இடங்கள் காலியாகவும், அமைதியாகவும் இருந்தது. அறிமுகங்களை தொடங்கலாம் என்று பார்த்த்தால் அதுக்கும் ஆளுக்காள் “நீங்க தொடங்குங்க, ஏன் நீங்க தொடங்க மாட்டீங்களா” (கல்லூரி பட இரட்டையர்கள் பாணி) என்று கலாய்க்க, ஒரு மாதிரியாக முருவில் இருந்து ஆரம்பித்து வலம் இருந்து இடமாக நகர்ந்தது.

”வந்துட்டாரையா..வந்துட்டாரு….”

கொஞ்ச நேரத்தில் கோவியார் வந்தார். லோஷன் அண்ணா என்னை திரும்பி பார்த்து “யார் இவர்” என்று பார்வையால் கேட்க, நான் அதிர்ச்சியடைந்து “இவர் தான் கோவியார்” என்று சொன்னேன். அப்படியே உரையாடல்கள் லோஷன் அண்ணாவை மையமாக கொண்டு தொடர்ந்தது. நடப்பு விவகாரங்கள் பற்றி கருத்தாடல்கள் இடம்பெற்றன. இந்தியா பற்றி லோஷன் அண்ணா மற்றவர்களிடம் கேட்டு கொண்டார். அப்படியே அப்பப்ப கிரிக்கெட்டையும் தொட்டுச் சென்றார். “T20 உலக கிண்ணம்” பற்றியும் கதைக்கபட்டது. அன்று அரை இறுதியில் இலங்கை வென்ற விசயம் கூட அலுவலக அலுவல் காரணமாக சிங்கையில் நின்ற படியால் அவருக்கு தெரிந்திருக்கவில்லை. ”இலங்கை வெற்றி பெறும்” என்பதே பொதுவாக எல்லாரது எதிர்பார்ப்பாக இருந்தது. எனென்றால் எதிரணி நட்பு நாடாச்சே….:-)

சிங்கை தேசிய தின (Aug 9) ஒத்திகை ஒவ்வொரு சனியும் நடைபெறுகின்றது. அதன் போது சிங்கை கொடியை காவிக்கொண்டு செல்லும் அப்பாச்சி ரக ஹெலிகொப்டர்கள். சிங்கை FLYER பிண்ணனியில்.

இது பற்றிய விபர பதிவு பின்பு வரும் :-)

வழமை போல் நொறுக்கு தீனிகள்,குளிர்பாங்கள் பரிமாறப்பட்டன. விஜய் ஆனந்த் தாமதமாக வந்தார். இலங்கை பேச்சு தமிழ், குறிப்பாக நான், விசாகன், லோஷன் 3 பேரும் பேசும் விதம் ஒருத்தருக்கொருத்தர் வித்தியாசமாக இருப்பதாக முருகேசன் உட்பட சிலர் கருத்து தெரிவித்தனர். லோஷன் அண்ணாவுக்கு வானொலிகளில் பணியாற்றுவதனால் அந்த வானொலிகளின் பாணிக்கு ஏற்ப மாறவேண்டி இருந்தமை காரணமாக இருக்கலாம்.நாமெல்லாம் எம் சொந்த இடங்களில் இருந்து இடம் பெயர்ந்து இருப்பது கூட காரணமாக இருக்கலாம். நான் இஞ்ச சிங்கையில் எங்கட தமிழ் கதைப்பது குறைய. இந்திய/சிங்கை தமிழர்களுடன் நான் அப்படி கதைச்சா, அவர்களுக்கு விளங்காது. எனக்கு இப்பவே கொஞ்சம் கொஞ்சம் சிங்கை வழக்கு உள்ளே நுழைந்து விட்டது. ஏதோ முற்றிலும் மாறிவிடாமல் இருக்கிறோமே…அதுவரைக்கும் நல்லம்.

லோஷன் அண்ணா எல்லோரிடம், எப்படி நீங்கள் பதிவு எழுத நேரம் ஒதுக்குகிறீர்கள் என்று கேட்டு ஆலோசனை பெற்றுக் கொண்டார். அவருக்கு 1 பதிவு போட கிட்டத்தட்ட 4 மணித்தியாலம் எடுக்குதாம். இருந்தாலும் நம்ம கோவியார் மாதிரி டீ குடிக்கிற கப்பில் (gap) பதிவு போட்ட சாதனையை யாரலும் மிஞ்ச முடியாது. அப்படியே தமிழிசு, தமிழ் மணம் திரட்டிகளின் புதிய விதி முறைகள் பற்றியும் கலந்தாயப்பட்டது. சிந்தித்து சீரியஸா எழுதும் பதிவுகள் வாக்குகள் பெற தவறுவது பற்றி அனைவரும் விசனம் தெரிவித்தனர். இப்போதெல்லாம் கும்மிகளும், தொடர்பதிவுகளும் களை கட்டுகின்றன.

இப்பவாவது நம்புறீங்களா, ஜோதிபாரதி ”வெளிச்சப் பதிவர்” தான் என்று…? :-))

இருட்டத் தொடங்கிவிட்டது. சபையை கலைத்து விட்டு கோப்பிக் கடை செல்லும் நேரம் வந்து விட்டது. அதற்கு முன் குழும மற்றும் தனி படங்கள் எடுத்துக் கொண்டோம். 3 F16 விமானங்கள் வானத்தில் பறந்து நம் சிறப்பு விருந்தினர் லோஷன் அண்ணாவுக்கு மரியாதை செலுத்தின. இது நம் ஏற்பாடு அல்ல, சிங்கை தேசிய தின கொண்டாட்ட ஒத்திகை நிகழ்வு.

நம்புக்கப்பா..இது F16 தான். sorry Zooom பண்ணி எடுக்க முடியலை…

கோப்பிகடையில் கோப்பி, தேனீர் அருந்தி கொஞ்ச நேரம் கும்மி அடிச்சிட்டு, அப்படியே அனைவருடனும் விடைபெற்றுக் கொண்டோம்.

ஞானசேகரனின் காணொளி தொகுப்பு இங்கே

சிங்கை பதிவர் ஒன்றுகூடல் அழைப்பு 20.06.2009

2009-06-19T12:46:00.001+08:00

அன்புடையீர்,

நாளை மாலை 4 மணிக்கு புற நகரான Kallang ல் நதிக்கரையோரமாக நமது சிங்கை பதிவர்களின் ஒன்று கூடல் நடைபெற உள்ளது.

இந்த ஒன்றுகூடலில் கலந்து கொண்டு எம்மை சிறப்பிக்க ஒரு பிரபலம் வருகிறார். வானலைகளில் தன் குரலை அழுத்தமாக பதிவு செய்துகொண்டும், தற்போது வலைப்பதிவுகளிலும் கலக்கிக்கொண்டிருக்கும் ”லோஷன்” அண்ணா தான் அந்த பிரபலம்.

(படம் அவர் வலைத்தளத்தில் இருந்தே பெறப்பட்டது)

விபரங்கள்

திகதி: 20.06.2009, சனிக்கிழமை

இடம்: KALLANG RIVERSIDE PARK (NEAR KALLANG MRT)

நேரம்: பின்னேரம் 4 மணி

இடம் பற்றிய மேலதிக விபரங்கள் இங்கே. KALLANG MRT ல் இருந்து நடக்கின்ற தூரம் தான் (Singapore Flyer பக்கமாக). Diving directions மேல தரப்பட்ட இணைப்பில் உள்ளது. சென்று பார்க்கவும்.

நிகழ்ச்சி நிரல்

வழமையான மங்கள விளக்கேற்றல், தீர்த்தோற்சவம், மொக்கை, நக்கல் என்று இத்யாதிகள் இருப்பினும் நம் சிறப்பு விருந்தினர் லோஷன் அவர்களின் “உலக கிண்ண T20 போட்டியில் எந்த அணி வெற்றி பெறும்” என்ற சிறப்பு அலசல் ஆய்வு பேச்சு இடம் பெறும் என்பதை தெரிவித்து கொள்ள விரும்புகிறோம்.

அனைவரையும் கலந்து கொள்ள வருமாறு அன்புடன் அழைக்கிறோம்.

நன்றி

பியானோ வாசிக்கும் பூனை

2009-06-08T16:51:00.001+08:00

நோரா (Nora), இவர் தான் அந்த பியானோ வாசிக்கும் பூனை. இசைக்கலைஞர் ஒருவரின் மகளால் 1 வயதாக இருக்கும் போது தத்தெடுக்கப்பட்ட நோரா தானாகவே பியானோ மேலே ஏறி தன்றபாட்டுக்கு பியானோ வாசிக்க கற்றுக் கொண்டதாம். அவ்வப்போது அந்த இசைக்கலைஞரின் வீட்டுக்கு வரும் மாணாக்கர்கள் முன்னிலையிலும் தன் இசைத்திறமையைக் காட்ட, அவர்களும் அதிசயித்து நோராவின் இசை அருவியை வீடியோ எடுத்து யூடியூப்பில் போட்டி பிரபலம் தேடிக் கொடுத்தனர். அன்று முதல் நோரா, ஒரு யூடியூப் பிரபலம்.

இவர் பற்றி BBC ல் வந்த செய்தி தொகுப்பு. நோராவின் பியானோ இசை பிண்ணனியில் ஒரு ஒர்கஸ்டா நிகழ்ச்சி நடைபெற உள்ளதாம்.

நோராவின் சொந்த இணைய தளம். http://www.ravenswingstudio.com/NoraWeb/nora_home.html

நோராவின் யூடியுப் பக்கம் http://www.youtube.com/user/burnellyow

………………………………………………………………

(பக்கத்தில் யாரோ கிட்டார் வாசிக்கிற சத்தம் கேட்குது. எந்த நாயோ தெரியவில்லை. போய் பார்த்திட்டு வாறன்.)

Windows 7 & XP/Vista together

2009-06-07T19:02:00.001+08:00

Windows 7 கிட்டத்தட்ட VISTA இன் மறுவடிவாக்கம்தான். குறிப்பாக Tablet PC வைத்திருப்பவர்களுக்கு இதன் graphical interface நன்றாக இருக்கும். Touch technology ன் இன்னொரு பரிமாணத்துக்கு உதவக்கூடும். Release Candidate இலவசமாக வெளியிடப்பட்டிருப்பதால், அனைவரும் முயற்சித்துப் பார்க்கலாம்.

அதற்கு முதலில் உங்கள் கணினி தயார் நிலையில் உள்ளதா என்று பரிசோதித்துப் பார்க்க வேண்டும். அதற்கு Windows 7 Upgrade Advisor ஐ உங்கள் கணினியில் நிறுவி பரீட்சித்துப் பார்க்கவும். குறிப்பாக சில மென்பொருட்கள், வன் பொருட்கள் Windows 7 க்கு தயார் நிலையில் இல்லாமல் இருக்கலாம். குறிப்பாக இன்னமும் XP பாவிப்பவர்கள் இத்தகைய சிரமங்களை எதிர் கொள்ளலாம். VISTA பாவிப்பவர்களுக்கு எத்தகைய சிக்கல்களும் பெரிதாக இல்லை.

(Sample Windows 7 upgrade Advising report)

XP ல் இருந்து Windows 7 க்கு போக விரும்புவர்கள், உங்கள் Hard Disk ஐ back up செய்வது அவசியம். Back Up செய்த பின் Format செய்வது installation ஐ இலகுவாக்கும்.

VISTA ல் இருந்து Windows 7 க்கு போவதில் பெரிதாக சிக்கல் இல்லை. Hard Disk ஐ back up செய்யலாம். ஆனால் தேவையில்லை. நேரடியாகவே system files மாற்றப்படுவதால் எந்த ஒரு பிரச்சினையும் இல்லை.

Windows 7 RC version கிட்டத்தட்ட அடுத்த வருடம் ஜூன் வரை இலவச பயன்பாட்டில் இருக்கும். எனவே அதற்கு மேலும் தொடர்ந்து பாவிக்க முடியாமல், அதனை உத்தியோகபூர்வமாக காசு கொடுத்து வாங்க முடியாத/விரும்பாத அனைவரும் இப்படி நேரடியாக Windows 7 க்கு மாறுவதை தவிர்த்து, பழைய Operating System (Vista/XP) ஐயும் Windows 7 ஐயும் தனி தனி partition ல் வைத்திருக்கலாம். அதற்கு உங்கள் hard disk ல் போதுமான அளவு இட வசதி இருக்க வேண்டும். (Hard Disk கள் இப்போது 1000 + GB (1 TB) ரீதியில் இருப்பதால் பிரச்சினை இல்லை, மாற்ற விரும்பினால் இன்னும் சிலவாரங்களில் வர இருக்கும் IT shows க்களை பயன்படுத்திக்கொள்ளவும்)

இங்கே சென்று உங்கள் Windows 7 RC ஐ தரவிறக்கம் செய்யலாம். அதற்கு முன் உங்கள் கணினி System ஐ சரி பார்த்து நீங்கள் 32 அல்லது 64 bit processor என்பதை தெரிந்து கொண்டு உங்களுக்கான 32 அல்லது 64 bit RC ஐ தரவிறக்கவும். Product Key ஐ மறக்காமல் சேமித்து/எழுதி வைக்கவும்.

தரவிறக்கிய File, .ISO format (image) ல், இருக்கும் இதனை Nero அல்லது வேறு மென்பொருட்களை பாவித்து DVD ல் அடித்துக்கொள்ளவும்.

நேரடியாக Windows 7 க்கு போக விரும்புவர்கள் DVD ஐ run பண்ணி அப்படியே Install, next, என்று போயிட்டே இருங்கோ. எங்கையாவது தப்பு நடந்தா, ஒன்னும் பயப்பட வேண்டாம். Default O/S மீள் இருப்பு (Restore) செய்யப்படும். ஒரு பிரச்சினையும் இல்லை என்றால் 20 நிமிடங்களில் Windows 7 உங்களை வரவேற்கும்.

சரி புதிய partition ல் install செய்ய விரும்புவர்கள், முதலில் ஒரு partition ஐ உருவாக்குங்கள் அல்லது தெரிவு செய்யுங்கள். இதற்கு நீங்கள் Administrator account type இல் log in ஆக வேண்டும். Start –> Run இல் ”diskmgmt.msc” என்று அடித்தால் Disk Management wizard வரும். அதன் மூலம் உங்கள் Hard Disk partition ஐ ஆராயலாம். உங்கள் பழைய system files இருக்கும் drive ஐ தவிர்த்து புதிதாக ஒன்றை தெரிவு செய்யுங்கள் அல்லது உருவாக்குங்கள். (தற்போது C drive இல் system இருந்தால் D drive ல் புதிய paritition ஐ உருவாக்குங்கள்). மூன்றாம் தரப்பு மென்பொருட்களான Partition Magic போன்ற மென்பொருட்களையும் இதற்கு பாவிக்கலாம்.

Partition வெற்றிகரமாக உருவாகிவிட்டதா, சரி இனி நீங்கள் windows 7 ஐ install பண்ண தயாராகலாம்.

DVD ஐ Run பண்ணவும். Install Windows 7 ஐ தெரிவு செய்து, வழக்கமான terms & conditions ஐ ஆதரித்து விட்டு மேலும் தொடர்ந்தால் கீழே உள்ள திரை வரும்.

Custom (Advanced) option ஐ தெரிவு செய்யவும்.

இங்க கவனமாக நீங்கள் விரும்பும் partition ஐ தெரிவு செய்யவும், மாறி பழையதை தெரிவு செய்தால் பழைய system files க்கு ஆப்பு தான்.

அப்பப்ப கணினி Restart ஆகி installation தொடரும். கிட்டத்தட்ட 20 நிமிடங்கள் வரை எடுக்கும்.

எல்லாம் வெற்றி கரமாக முடிந்த பின் கணினையை Restart செய்தால், BIOS screen க்கு பின், Opertaing System தெரிவு செய்யும் திரை வரும். நீங்கள் விரும்பும் system ஐ தெரிவு செய்து உள்ளெ நுழையலாம். (கிட்டத்தட்ட 10 ஆண்டுகளுக்கும் பின் DOS/Windows காலத்துக்கு பின் இப்போது தான் dual O/S பாவனைக்குள் நுழைகிறேன்)

Task bar ல் முன்பு போல் Applications குவியாமல் கட்டுப்பட்டுத்தப்பட்டிருக்கின்றது. IE எத்தனை window open பண்ணினாலும், அல்லது எத்தனை tap open பண்ணினாலும், அழகாக cascade பண்ணுகின்றது. சில சமயங்களில் Apple O/S ஐ ஞாபகப் படுத்துவதை தவிர்க்க முடியவில்லை

இனி உங்களுக்கு தேவையான மென் பொருட்களை தரவிறக்கம் செய்யவும். Windows Live மென்பொருட்கள், Google Pack போன்றவற்றில் எந்த பிரச்சினையும் இல்லை. பெரும்பாலான மென்பொருட்கள் Windows 7 ல் பாவிக்ககூடியதாகவே உள்ளது. Vista வில் பாவிக்க முடிந்த பெரும்பாலானவை இங்கேயும் பாவிக்கலாம். இருந்தாலும் தரவிறக்கம் செய்யும் போது அவற்றின் Requirement களை ஒருக்கா பார்த்து விடுவது நலம்.

தகவல்களை சுட்டு நான் பயன் பெற்ற இடம்:TECHSPOT

நீங்களும் பயன் பெற்றுகொள்ளுங்கள். :-)

கானா பிரபா & சிங்கை பதிவர்கள் திடீர் சந்திப்பு 14.05.2009

2009-05-15T21:40:00.001+08:00

உத்தியோக (பூர்வ) விஜயம் மேற்கொண்டு சிங்கை வந்த பிரபல பதிவர்/வானொலி அறிவிப்பாளர்/எழுத்தாளர்/ இன்னும் பல பெருமைகளை தன்னடக்கத்துடன் கொண்ட “கானா பிரபா” அவர்கள் நம் சிங்கை பதிவர்களை “உத்தியோக பற்றற்ற” நிலையில் சந்திக்க விரும்புவதாக தகவல் தெரிவிக்க, அனைவரையும் லிட்டில் இந்தியாவில் இரவு 7 மணிக்கு ஒன்று கூடுமாறு நேற்று (14.05.2009)தீடீர் அறிவித்தல் வெளிவந்தது.

டோபி ஹோட் தொடரூந்து நிலையத்தில் ஏறும் போதே உள்ளே ஊர் சென்று திரும்பிய ஜமால், மற்றும் பாரதி. அன்று கானாவின் பிறந்த நாள் வேறு. பரிசளிப்பதற்காக முஸ்தபாவில் இறங்கி புத்தகங்கள் தேடினோம் . இதற்கிடையில் ஆயில்யன் தன் சார்பாக கானாவை சந்திக்க தன் நண்பர் ஒருவரை பிரதிநிதியாக அனுப்பி வைக்க, அந்த நண்பரோ தனக்கு வர நேரமாகும் என்று இன்னொருவரை பிரதிநிதியாக அனுப்பி வைத்தார். நான் எடுத்த ஒரே புத்தகமும் ”ஏ”டாகூடமாக இருக்க, அந்த புத்தகத்தை கோவியாருக்கு பரிசளிக்கலாம் என்று வைத்து விட்டு வேறு தேடினோம். அரை மணி நேரம் மினக்கெட்டு எப்படியோ வாங்கிக்கொண்டு காளி கோயில்/ காரைக்குடி உணவகம் நோக்கி நடையைக் கட்டினோம்

7 மணியளவில் கானா பாரதியை தொடர்பு கொண்டு இடம் கேட்க அடையாளம் சொன்னோம். சில நிமிடங்களில் முக்கால் காற்சட்டையுடன் Typical Tourist கெட்டப்பில் ஒருவர் கோயிலை நோக்கி செல்வது தெரிய, முகம் பார்க்காமலே மலர்ந்தோம். அது தான் கானா…நாம் கை காட்ட அவரும் அடையாளம் கண்டு கொண்டார். அறிமுகங்கள் நடந்தன. நானும் யாழ்ப்பாணம் என்று அறிந்து ஊர் பற்றி விசாரித்துக்கொண்டோம். அவர் இணுவில். நான் கொக்குவில்.

கிஷோர்: “யோவ் டொன்…மெனுவை பார்த்துமா உன்னால் இப்படி சிரிக்க முடியுது…”

நான்: “மெனுவே புத்தகம் கணக்கா பெருசா இருக்கு, இதையே கானாவிற்கு பிறந்த நாள் பரிசா கொடுத்திடலாமா…?

கானா: ”என்ன கிஷோர் கையெல்லாம் ஏன் இப்படி நடுங்குது…?”

கிஷோர்: “எல்லாம் இந்த மெனுவைப் பார்த்து தான்”

அப்படியே மற்றவர்களும் வரத்தொடங்கினார்கள். ஜோதிபாரதி, செந்தில் நாதன், துபாய்லிருந்து திரும்பிய வடுவூர் குமார், கிரி, கிஷோர் என்று ஆட்கள் சேர இளநீர் குடிக்கலாம் என்று தெருவோரக் கடைக்குள் நுழைந்து நடைபாதையை இடைஞ்சல் செய்தோம். பின் கதைப்பதற்கு நல்ல இடம் தேடலாம் என்று ஒரு வட இந்திய உணவகம் ஒன்றுக்குள் நுழைந்தோம். பெயர் கமிஷா…கடைக்குள் ஒரே சிற்பங்கள் தான். கலைநயமான உணவகம். எங்களைப் பார்த்த கடைக்காரர் மேல் மாடிக்கு போங்கோ என்று அனுப்பி விட்டார், முடிவெடுத்து விட்டார் இவனுங்க பேர்ஸை மொட்டை அடிக்காமல் விடுவதில்லை என்று.

“பிறந்த நாள் நாயகன் சிரித்த முகத்துடன்” கூடவே 16 000 பின்னூட்டம் கண்ட ஜமால்

கிட்டத்தட்ட அரை மணித்தியாலம் சாப்பாடு ஓடர் பண்ணாம நாம் அடிச்ச லூட்ட் காரணமாக மாடிப்படி அருகே இரு காவலர்கள் நிறுத்தப்பட்டனர். கோவியாரும் இராமும் ஒரு வழியாக ஆஜராகி விட, நாமும் வேறு வழியில்லாமல் சாப்பாடு ஓடர் பண்ண வேண்டியதாகிவிட்டது.

“சேர்….ஆப் நே கியா…சாறி….இப்பவாவது சாப்பாடு ஓடர் பண்ணிறீங்களா…?”

ஆயில்யனினின் பிரதிநிதிகள், செந்தில் நாதன், இராம்

கானாவின் பிறந்த நாளை முன்னிட்டு வாழ்த்துகளை பரிமாறி பரிசில்களை கொடுத்தோம். வழமையான உரையாடல்கள். அனைவருடனும் கானா சிரித்துப் பேசினார். அது ஏன் “கானா” என்று தன் இனிசியலுக்கு கொடுத்த விளக்கம் கனபேருக்கு விளங்கவில்லை. என்னைத் தவிர, கானாவின் “கம்போடிய பயணம்” நூல் பற்றி நாம் அவரிடம் கேட்டபோது “தனக்கே இன்னும் அந்த நூல் வந்துசேரவில்லை” என்று சிரித்தவாறே சொன்னார்.

“என்னது…சிக்கனா…? யோவ் இது என் தட்டு கிடையாதுப்பா…!

கோவியார், பின்னாடி ஜோதிபாரதி, & இராம்

நாண், சிக்கன், மட்டன், சைவ உணவு என்று வகையாக உணவு உட்கொண்டவாறே உரையாடல்கள் தொடர்ந்தது. கிட்டத்தட்ட 9 மணி வரை தொடர்ந்தது. பில் கட்டப் போவது யாரு என்ற போட்டியில் “கானா” வெற்றி பெற்றார். அதனால் நாம் மனவருத்தம் அடைந்தோம். அதனால் கானா மகிழ்ச்சி அடைந்தார்.

செந்தில் : “ கானா நீங்க 2 நாள் முன்னாடியே எனக்கு சொல்லியிருந்திருக்கலாம்…?”

கோவி: “எதுக்கு அல்வா செஞ்சு எடுத்துட்டு வரவா…?”

(கோவி, கானா, செந்தில், கிரி)

ஒருவழியாக 10 மணியளவில் விடை பெற்றுக்கொண்டு சபையைக் கலைத்தோம். கானாவை சந்தித்ததில் அதிலும் அவரது பிறந்த நாள் தினத்தில் சந்தித்ததில் அனைவருக்கும் மிக்க மகிழ்ச்சி.

கானா, பாரதி, கிரி, நான் (நாண் இல்லை நான்)

நன்றி கானா பிரபா….!

சிங்கை பதிவர் மாநாடு 18.04.2009 அறிக்கை

2009-04-19T15:11:00.001+08:00

ஒரு வழியாக மாநாடு நடப்பது நிச்சயம் என்ற தகவலை பலரிடம் கேட்டு உறுதிப்படுத்தி விட்டு, (காரணம் பலர் வரமாட்டார்கள் என்ற நம்பத்தகுந்த வட்டாரங்களில் இருந்து கிடைத்த தகவல்) 2.30 க்கு வீட்டை விட்டு கிளம்பினேன். நான் இருக்கும் மேற்குபக்கத்திலிருந்து கிழக்கு கடற்கரைக்கு போக கிட்டத்தட்ட 1 1/2 மணி நேரம் எடுக்கும்.

பெடோக் தொடரூந்து மாற்று நிலையத்தில் இறங்கி பேரூந்துக்காக காத்திருக்கும் போது அப்பாவி முருகேசன் தன் நண்பருடன் தென்பட்டார். தற்போது தான் கோவியார் இன்னொரு நண்பருடன் கிளம்பியதாகவும் தெரிவித்தார். மாநாடு நடப்பதால் மட்டுமல்லாது சனிக்கிழமையும் ஆதலால் கிழக்கு கடற்கரை செல்லும் விசேட பேரூந்து 401 ல் கூட்டம் நிரம்பி வழிந்தது. (இந்தப் பேரூந்து சனி ஞாயிறு மற்றும் விடுமுறை போன்ற விசேட நாட்களில் மட்டும் தான் இயங்குவது வழக்கம்). சிறிது நேரத்தில் கிஷோரும் முதன் முறையாக சந்திப்புக்கு குறித்த நேரத்தில் தன் நண்பர் சிவாவுடன் ஆஜராக, நாம் பேரூந்தில் ஏறி மாநாட்டு திடலுக்கு ஆரவாரமாக புறப்பட்டோம்.

கிசோர்- “நல்லா பார்த்துங்க…நானும் கமெரா வாங்கிட்டன்…நானும் கமெரா வாங்கிட்டன்நானும் கமெரா வாங்கிட்டன்”

சிவா - “ச்சப்பா….இப்பவே கண்ண கட்டுதே”

பேரூந்தில் செல்லும் போதே அய்யங்கார் தொலைபேசியில் அழைத்து காலதாமதமாக வருவதற்கு தனது கண்டங்களை தெரிவித்து கொண்டார். வழக்கம் போல அந்த கண்டனத்தை நாம் குப்பை தொட்டியில் போட்டு விட்டோம். மாநாட்டு இடம் என்று சொன்னால் பேரூந்து கப்டனுக்கே (இங்கே ஓட்டுனரும் கப்டன் தான்) தெரிந்திருக்கின்றது. அவ்வளவு தூரம் நம் செயல் பாடுகள் பரவியிருக்கின்றது குறிப்பிடத்தக்கது.

அக்னி நட்சத்திரம் இந்தியாவை மட்டுமல்ல, கொஞ்சமாக சிங்கையையும் தாக்க தொடங்கிவிட்டதால், வெயில் ஆனந்த தாண்டவம் ஆடியது. எனினும் கடற்கரை காற்று, நிழல் தரும் மரங்கள், அழகான கா(ப)ட்சிகள் என்பவை நமக்கு குளிர்மையை ஊட்டின. கோமலவிலாஸ் அருகே நடந்து கொண்டே நம்மை வரவேற்க யாரவது வந்திருக்கிறார்களா என்று பார்த்த போதே, தூரத்தே இருவர் கைகாட்டினர். புதியவர்களாக தெரிந்ததால் எதுக்கு போய் பார்க்கலாம் என்று போனோம். “பிளாக்கர் மீட்டிங் தானே..” கேட்டவாறே தன்னை அறிமுகம் செய்தார் ராஜேஷ் எனப்படும் பதிவர் அறிவிலி. கூடவே கோவியாரின் நண்பர் மலேசிய வாசகர் ஜவாகர். பரசூட் பாய்ச்சல் செய்தவர் இவராக இருக்கக்கூடும்.

ஜவாகர் & அறிவிலி

அய்யங்கார், மற்றும் கோவியாரும் கடையில் இருந்து குடிபானங்கள் வாங்கிக் கொண்டு வர, நாம் மாநாட்டு திடலுக்கு சென்றோம். இது கடற்கரையில் இருந்து ஒதுங்கி அமைதியான மரச்சோலைகளுக்கு மத்தியில் அழகாக, அமைதியாக இருந்தது. பந்தல்கள், சுவரொட்டுகள் என்பவை சூழலை மாசடைய செய்பவை என்பதால், அவற்றை நாம் தவிர்த்தமை குறிப்பிடத்தக்கது. பலர் வந்து கொண்டிருந்தமையால் மாநாடு தொடங்குவது தாமதிக்க தொடங்கியது.

அய்யங்கார் :”ஆமா நான் இந்த தேர்தலில் யாரையும் ஆதரிக்க மாட்டேன்”

முருகேசன் (மனதுக்குள்): “விசயகாந்தை ஆதரிச்சா தப்பா என்னா…?”

வழமை போல் விவாதங்கள் தொடங்கின. தேர்தல் காலம், அரசியலில் விவாதம் தொடங்கியது. இரு கழகங்களிலும் அனைத்து கட்சிகளிலும் நம்பிக்கை இழந்தி இருப்பதாக அய்யங்கார் மற்றும் கோவியார் கூறியபோது “விசயகாந்த்க்கு வாய்ப்பு கொடுத்தால் என்ன…?” என்று அப்பாவியாக முருகேசன் கேட்க, விசயகாந்த் நம்மவர்களால் பந்தாடப்பட்டார். ஒரு காலத்தில் சுழட்டி சுழட்டி காலால் வில்லன்களை பந்தாடி, நம்மவர்களை கொள்ளை கொண்ட விசயகாந்த் மீது அவ்வளவு கொலை வெறியுடன் இருந்தனர் பல பதிவர்கள். ஆரமபத்திலேயே அய்யங்கார் அவர்கள் சிங்கை நாதன் வரமாலும் அல்வா அனுப்பிவிடாமலும் “அல்வா” தந்தமைக்கு கண்டன தீர்மானம் நிறைவேற்றினார்.

இளங்குமரன் “தம்பி எனக்கு இந்த மாநாட்டில் கலந்து கொள்ள சொல்லி இந்தியாவிலிருந்து தமிழ் அமைப்புகளில் இருந்து தகவல் வந்திச்சு…”

நான் மனசுக்குள் “கொஞ்சம் ஓவரா பில்டப் போட்டிட்டேனோ…?”

சற்று நேரத்தில் மீனாட்சி சுந்தரம், இளங்குமரன் ஐயா ஆகியோர் வந்தடைந்தனர். மீனாட்சிக்கும் எனக்கும் ஏற்பகவே ஒரு பகை இருந்ததால், இருவரும் ஆளுக்காள் சவால் விட்டு சண்டை போட்டுக் கொண்டோம். இளங்குமரன் ஐயா அவர்கள் “இன்று சிங்கையில் பெரிய மாநாடு நடக்கின்றது. கட்டாயம் நீங்கள் போய் கலந்துகொள்ளுங்கோ” என்று தனக்கு சில தமிழ் அமைப்புகளிடம் இருந்து அறிவித்தல் வந்ததாக சொல்ல, நாம் சற்றே குழம்பினோம். இதேவேளை பல்வேறு நாடுகளில் இருந்து மாநாட்டுக்கு வாழ்த்தி குறுஞ்செய்திகளும், தொலைபேசிகளும் வந்தன. இராகவன் நைஜீரியாவில் இருந்து தொலைபேசியில் அழைத்து வாழ்த்து தெரிவித்தார். இன்னும் சிலர் பத்திரிகையில் கவிதை கூட எழுதினார்களாம். எது எப்படியோ நாங்க சர்வதேச அளவில் பிரபலமாகிக்கொண்டிருக்கிறோம்.

அய்யங்கார்: “என்ன தைரியம் இருந்தா ரீத்திசை பற்றி கேட்ப…?”

மீனாட்சி: “இருடா உன்னை போட்டு தள்ளிறன்…”

முகவை இராம் : “அடடா இது நல்லாயிருக்கே…”

இதேவேளை பேச்சு யாரோ ரீத்தீசாம் அவரை பற்றி திரும்ப, நானும் பல்நாட்களாக கும்மி கழகத்தில் கேட்ட அதே கேள்வியை இங்கேயும் கேட்டேன் “யாரு அந்த ரித்தீசு…?” உடனே என் மீது ஆட்டோ, சைக்கிள் செயின் போன்ற மென்பொருட்களை ஏவுவேன் என்று மீனாட்சி மிரட்டினார். அய்யங்கார் எனக்கு எதிராக கண்டன தீர்மானத்தை “ஒரு மனதாக “ நிறைவேற்றினார். ஆனால் கடைசிவரைக்கும் யாரும் என் கேள்விக்கு சரியான பதிலை தரவில்லை. கிசோர் தான் புதிதாக வாங்கிய சோனி அல்பா 350 ஐ வைத்து படம் எடுக்க முயன்று கொண்டிருந்தார். நம் கழகத்தில் இன்னொரு கமெரா கவிஞர். புதிதாக வந்திருக்கும் அறிவிலி தன்னை பற்றிய சிறிய அறிமுகத்தை தந்தார். சிங்கையில் 4 வருடங்களாக இருக்கும் அவர் 3 மாதங்களாகத்தான் பதிவுலகத்தில் இருக்கிறார்.

விஜய் : ”சைலன்ஸ்…. ரிப்போர்ட் பண்ணிட்டு இருக்கின்றலில்ல….?”

கோவியார்: “அரசியல் விவாதத்தை திசை திருப்ப ஆன்மிக சொற்பொழிவு ஆற்றலமா…? இல்லை சாப்பாட்டு பொட்டலத்தை திறக்கலாமா…?

ஜெகு: “இந்த ஆளு சாப்பாட்டு பொட்டலத்தை எப்ப திறப்பாரு…?”

இடையில் சாப்பாட்டு பொட்டலத்தை கோவியார் திறக்க, சூடான கடலை (கடலை போடுபவர்களுக்கு… சிம்பாலிக்…?) கேசரி, மற்றும் நொறுக்குஸ் பரிமாறப்பட்டன அந்த நேரம் பார்த்து சரியாக விஜய் ஆனந்த், ஜெகதீசன், முகவை இராம், கமரா இராம, அகரம் அமுதா, அ.ஞானசேகரன் போன்றோர் வந்தடைந்தனர். சாப்பாட்டுடன் விவாதமும் தொடர்ந்தது. இளங்குமரன் ஐயா அவர்கள் ஆசிரியர் என்று அறிந்த அமுதா அவர்கள் “அவரால் எப்படி 18 மணிநேரம் தூங்காமல், 13 மணி நேரம் வேலை செய்ய முடிகின்றது” என்ற கேள்வியில் சூடு பிடிக்க தொடங்கிய விவாதம் “சரி அப்ப யார் தான் தமிழர்கள்…?” சக பதிவர்கள் கேட்கும் நிலைக்கு வர குழப்ப மடைந்த அமுதாவும் நாமும் “யாருமே தமிழர்கள் இல்லை” என்று முடிவுக்கு வந்ததாக தெரிகின்றது. அமுதா தான் ஒரு தமிழ் மென்முறையாளன் என்று கூறியது குறிப்பிடத்தக்கது.

அமுதா :”கொஞ்சம் ஓவரா தான் பேசிட்டேனோ…?”

முரு நண்பர்: “ தெரியாம வந்திட்டன்…. அரசியல் பற்றி எல்லாம் பேச சொல்லிறாங்களே”

நமது கமரா இராமுக்கு இன்று பிறந்த நாள். அதனை முன்னிடு நேற்று அவருக்கு சிறப்பு வாழ்த்துரைகள், (இரவு சிறப்பு தீர்த்தோற்சவமும்) நடைபெற்றது. இராம் இன்று கொண்டாடுவது எத்தனையாவது பிறந்தநாள் என்பதில் சில வாதப் பிரதிவாதங்கள் இடம்பெற்றன. இராம் வழமை போல் தன் கமராவிற்கு வேலை கொடுத்துக் கொண்டிருந்தார். 6 மணியாகும் போது ஜவாகர் அவர்கள் விடைபெற்று செல்ல நாம் நமது வேலையை தொடர்ந்தோம்.

விவாதம் மறுபடியும் அரசியல் பக்கம் திரும்பியது. “இந்திய தேர்தலில் யாருக்கு உங்கள் வாக்கு, அல்லது ஆதரவு நிலை..?” என்பதை பற்றி விவாதிக்கலாம் என்று முகவை இராம் பரிந்துரைக்க, அதனை ஏற்றுக்கொண்டு ஒவ்வொருவரும் தாம் யார் யாரை ஆதரிப்போம் என்று கருத்துரைத்தனர். 49 ஓ விற்கே ஆதரவு அதிகமாக இருந்தது. ஆனாலும் 49 ஓ வினால் எந்த ஒரு பயனும் இல்லை என்பதை பலரும் மறுக்கவில்லை.

முகவை இராம் “ஹையா…குப்புற படுத்துக்கிட்டே கும்மி போடிறது என்னா சுகம்..”

இரவு 7.30 மணியளவில் சந்திப்பு நிறைவு பெற, பலர் அங் மோ கியோ இராம உற்சவத்துக்கு செல்ல, நான், ஞானசேகரன், இளங்குமரன், மீனாட்சி, அறிவிலி ஆகியோர் பேரூந்தில் ஏறி ஒரு சிற்றுலா சென்று விட்டு பெடொக் சென்றடைந்தோம். அப்படியே தொடரூந்தில் ஏறி பயணத்தை தொடர்ந்தோம்.

பதிவர் அறிவிலியின் மாநாட்டு குறிப்புகள் இங்கே.

சிங்கை பதிவர் மாநாடு 18.04.2009

2009-04-14T21:54:00.001+08:00

அன்புடையீர்…!

வழமை போல் நம் சிங்கை பதிவர்கள் மாநாடு வரும் சனிக்கிழமை பின்னேரம் 3.30 மணிக்கு கிழக்கு கடற்கரை பூங்காவில் (East Coast Park) பெருந்திரளான மக்கள் ஆதரவுடன் நடைபெறவுள்ளது.

இடம்: கிழக்கு கடற்கரை பூங்காவில் (East Coast Park) Park C, கோமலா விலாஸ், MCDonalds அருகில்…இந்த இடம் ஒன்று கூட மட்டுமே…மாநாடு கடற்கரை திடலில் நடைபெறும்

எப்படி வருவது:

எப்படி வேணுமானாலும் வரலாம். சாங்கி விமான நிலையம் வரும் விமானங்கள் தரையிறங்க தொடங்குவது இந்த இடத்துக்கு அருகில் என்பதால் நடு வானில் இருந்து பரசூட் பாய்ச்சல் செய்யலாம்.

இல்லை காரில் வருகிறவர்கள் காருக்கு பெட்ரோல் போட்டு, பார்க்கிங் கூப்பன் எல்லாம் போட்டுக்கொண்டு ECP எக்ஸ்பிரஸில் ஏறி, பார்க் C க்கு exit எடுக்கவும். வாடகைக்கார் எடுப்பவர்கள் Park C, Mac அடையாளத்தை சொல்லவும்.

பொதுப்பேருந்து, தொடரூந்து எடுப்பவர்கள், Bedok வரை எப்படியாவது வந்து அங்கிருந்து பேரூந்து இலக்கம் 401 ல் ஏறவும். 92199 இலக்க தரிப்பிடத்தில் இறங்கவும். பார்க் C தொடக்கத்தில் இறங்கினாலும் வழி தவற மாட்டீர்கள்.

விபரங்களுக்கு 401 , ECP

பிரதான நோக்கம்: இந்திய தேர்தல் திருவிழா நெருங்குவதால் நாமும் இப்படி ஒரு மாநாட்டை போட்டு படம் காட்டும் நல்லெண்ணம்

உப நோக்கம்: அல்வா சாப்பிட்டு ரொம்ப நாளாகிவிட்டது.

நிகழ்ச்சி நிரல்: வழமையான கலந்துரையாடல்களுடன், இந்திய அரசியல் நிலை, அது பற்றி நமது பதிவர்கள் தெரிவிக்கும் விசனங்கள்

முக்கிய தீர்மானங்கள்: இந்த தேர்தலில் நாம் யாரையாவது ஆதரிக்கோனுமா…? இல்லை எதிர்க்கோனுமா…? இல்லை நாமளே புதுசா ஒரு அணி அமைச்சு போட்டியிடோனுமா…? அப்படி போட்டியிடுறது எண்டா, எத்தனை தொகுதியில் போட்டியிடலாம்…? சரத், கார்த்திக், ரஜினி, கமல், சிம்பு எல்லோருடனும் பேசனுமா…? பாஜக வந்து கேட்டா என்ன பதில் சொல்லோனும்…?

இந்த தீர்மானங்கள் வாக்கெடுப்புகள் மூலம் நிறைவேற்றப்படும்.

சிறப்பு சிற்றுரைகள்:

புது முகங்களின் அறிமுக உரைகள், JKR பற்றி ஸ்ரீலஸ்ரீ யூசுப் பால்ராஜ் அய்யங்கார் சுவாமிகளின் புகழுரை, அடிக்கடி சந்திப்புக்கு வராமல் டிமிக்கு கொடுக்கும் சில மூத்த உறுப்பினர்களின் பகீரங்க மன்னிப்பு உரை, முகவை இராம்குமாரின் தூய தமிழ் இராமயண கவி வெண்பா உரை, கோவியாரின் ஆன்மிக சொற்பொழிவு, இறுதியாக அப்பாவி முருகேசனின் நன்றியுரை…

சிற்றூண்டிகள்:

அல்வா (என்ன அல்வா என்று சாப்பிட்டாபிறகு தான் தெரியும்), வேற ஏதாவது திங்கிறமாதிரி ஏதாவது யாராவது கொண்டு வந்தா…

அனைவரும் வருக வருக என்று வரவேற்கப்படுகின்றனர்.

முக்கிய பிற்குறிப்பு: மழைகாலம், குடை கொண்டு வரவும்…:-)

தகவல் தொடர்புகளுக்கு

ஜெகதீசன் – 90026527, ஜோசப் பால்ராஜ்- 93372775, விஜய் ஆனந்த் - 97798649

You Are My Destiny … JAI HO – Pussycat Dolls

2009-04-06T21:49:00.001+08:00

நம்ம ரகுமானின் ஓஸ்கார் விருது பெற்ற பாடல் ஆங்கில வடிவம் பெற்று Pussycat Dolls எனப்படும் பெண்கள் பொப்பிசைக்குழுவால் RE MIX செய்யப்பட்டு ஒஸ்கார் விழா முடிந்த சில தினக்களிலே வெளியிடப்பட்டது. அதன் உத்தியோக பூர்வ காணொளிகள்…

இது கொஞ்சம் ஒளித்தரம் குறைஞ்ச காணொளி…

Pussycat Dolls தற்பொழுது இசை உலக உலா வந்து கொண்டிருக்கினம்.அதால யூடியூபில் தேடினா கனக்க JAI HO மேடை இசை நிகழ்ச்சிகளின் கணொளிகளையும் கண்டு களிக்கலாம்…:-)

Pussycat Dolls இன் இணையத்தளம்.

என்னோட பழைய JAI HO பதிவு இஞ்ச இருக்கு போய் பாருங்கோ…அதில சிங்கப்பூர் சீ மிக்ஸ் கூட இருக்கு. :-)

ஜப்பானில் ரஜினி – மிமிக்கிரி கலாட்டா

2009-04-05T12:48:00.001+08:00

ரஜினி ரஜினிதான்…

மீள்பதிவாக இருந்தா என்னை மன்னிக்கவும் :-)

நேர்முகத்தேர்வுகள் – Recession Time

2009-03-29T20:29:00.007+08:00

தேர்வு 1:

“வணக்கம்…”

.“சிங்கை சென்ற கண்மணியே வா…

சிகை சிலிர்த்த சிங்கமே வா…

தன்மானத்தமிழனே வா…

தரணியெங்கும் வென்றிட வா…”

.என்னடா இது நேர்முகத்தேர்வுக்கு வந்தா இப்படி சோதிக்கிறாரே…?.

“இந்தாருங்கள் ஐயா..என் சான்றிதழ்கள்…”.

“சான்றோன் என நீ நிரூபித்த பின் சான்றிதழ்கள் எதற்கு…வெற்றி என்பது நிச்சயமானபின் கூட்டணிகள் எதற்கு…?”.

என்ன கொடுமைடா இது…நான் வைக்கவேண்டிய ஐசை எல்லாம் இவர் எனக்கு வைக்கிறாரே….

என்னிடம் எந்த கேள்விகளுக் கேட்கப்படாமல், என்னைப் பற்றி பல புகழ்ச்சிகள் துதி பாடினார்…எனக்கே என் மேல் சந்தேகம் வந்தது…கொட்டாவியும் வந்தது..

பொறுமையின் எல்லை கடந்த நான்…“நன்றி ஐயா…எனக்கு இங்கே வேலை தராவிட்டாலும்… உங்கள் நெஞ்சத்தில் இடம் தந்ததற்கு நன்றிகள்…”.

“சென்று வா கண்மணியே…” என்று ஆரம்பிக்க, நான் மனசுக்குள் மறந்தும் இந்தப் பக்கம் இனிமேல் வந்துவிடக்கூடாது என்று முடிவெடுத்துக் கொண்டேன்.

தேர்வு 2:

10 மணிக்கு நேர்முகத்தேர்வு என்று போனா… பின்னேரம் 2 மணியாகியும் ஆரம்பமாகவில்லை. தலை(வி) வரவில்லையாம். ஒரு மாதிரி…3 மணி போல ஒரு வால் வந்து கூப்பிட உள்ளே சென்றால் கொஞ்சம் பெரிய வால்கள்…

“வாங்க…நல்லாயிருக்கீங்களா…?

“இருக்கேங்க…”

“சொல்லுங்க…”

“நீங்க சொல்லுங்க…”

“அம்மா தான் சொல்லனும்…”

“அம்மா தான் சொன்னாங்க…”

“நம்ம அம்மாவா…”

“எங்க அம்மா…”

“உங்க அம்மாவா…”

“உங்க அம்மா…”

“நம்ம அம்மா தானே…”

“எங்க அம்மா…”

.தலையைப் பிச்சுக்கிட்ட பெரியவால்கள், மரியாதையாக என்னை வழியனுப்பி வைத்தனர்.

இங்க வந்து வேலை செய்யுற நேரம் பேசாம என் அம்மாவோட சமையல்கட்டில வெங்காயம் வெட்டலாம்.

தேர்வு 3:

அலுவலகத்தில் நுழைந்தால் ஒருத்தரையும் காணோம். கொஞ்ச நேரம் கழிந்தால் உள்ளே பயங்கர அடிஉதை சத்தங்கள் கேட்க திடுக்கிட்ட நான் உள்ளே சென்று பார்த்தால் அங்கே வேலை செய்பவர்கள் ஒவ்வொருவரும் ஆளுக்காள் கட்டி பிடிச்சு சண்டை பிடிச்சுக் கொண்டி இருந்தினம். நானும் ஏதோ இடம் மாறி கராத்தே ஸ்கூல் பக்கம் வந்திட்டன் என்று குழம்பி வெளியேற முற்பட்ட போது…

“ஜெய் ஹோ…” பாட்டு ஒலித்தது. எல்லாரும் அமைதியாக வெளி மாநிலத்தவர் போல் தெரிந்த ஒருவர் பேசத்தொடங்கினார்.

“மேலிடத்து உத்தரவு படி இன்று முதல் தலமை மாற்றப் படுகின்றது. இன்று முதல் புதிய தலைவராக இவரை நியமிக்கிறேன்…” அவர் சுட்டிக்காட்டியது வாசலில் நின்று குழம்பிக்கொண்டிருந்த என்னை....

கூட்டம் அமைதியாக என்னைப் பார்த்தது. தங்களுக்குள் முணுமுணுக்க தொடங்கியது. எப்படியும் இண்டைக்கு பின்னேரமே கனபேர் டெல்லிக்கு பிளைட் பிடிப்பினம் போலத் தான் தெரிந்தது.

அவர்களை எல்லாரையும் பார்த்த நான்…

“இந்தப் பதவியிலிருந்து நான் விலகிக்கொள்கிறேன்…” என்று பதவி ஏற்கமுன்பே விலகிவிட்டு அகல, உள்ளே சண்டை மீண்டும் தொடங்கியது.

தேர்வு 4:

“வணக்கம்…வாங்க…அட பயப்புடாம வாங்க..ஈலத் தமிளரா நீங்க…?

அங்க ஈழத்தமிழரை குண்டு போட்டு கொல்றாங்க…இவர் தமிள் கதைச்சு கொல்றார்…

“உலகத்தில் மொத்தம் 10 லட்சம் ஈலத்தமிளரு…அதில ஈலத்தில் இருக்கிறது…” என்று வழக்கம் போல் ஆரம்பிக்க நான்

“வேலை விசயமா…”

“நான் யாருடனும் வேலை செய்யமாட்டன்…மக்களுடன் மட்டும் தான் வேலை செய்வன்…”

அப்ப நாங்களெல்லாம் மக்கள் மாதிரி தெரியேலையா…?

“நான் யாரைச் ”கை” காட்டிறனோ அவங்களுக்கு தான் மக்கள் வேலை கொடுப்பாங்க…இந்த நாட்டில எல்லா வேலையையும்…”

.“கை” காட்டிறாரா…இல்ல “கையை” காட்டிறாரா…? இதுக்கு மேல் ஏதாவது கேட்டா காலைச் சுழற்றி சுவற்றை உதைந்தாலும் உதைவார் என்று நான் பயந்து எழும்பி ஓடி வந்துவிட்டேன்.

தேர்வு 5:

சரி இனி வேலை தேடி மினக்கெடாம, நாமளே ஒரு வேலைவாய்ப்பை உருவாக்கலாம் என்று இணையத்தில் போய் ஒரு வணிக இணையத்தை (Biz Domain) பதிவு செய்து விட்டு இருந்தால் சிறிது நேரத்தில் ஒரு தொலைபேசி அழைப்பு

“வணக்கம்”

“ஜெய் ராம்… ஸ்ரீராம்… ஹேராம்…ராஜாராம்… ரகுராம…, ராம்ராம்…”

“அப்படி யாரும் இஞ்ச இல்லைங்க…”

“அதாங்க நாம உங்ககிட்ட வாறோம்…”

“ஓ…அவுங்களா நீங்க…?”

“பேசாம நீங்க எங்களிட்ட வாங்கோ…அகில இந்திய அளவில் நாங்கள் பிரபலமாக இருக்கோம். உங்க மாநிலத்தில் தான் எங்களுக்கு ஆளு தேவைப்படுது. உங்களை மாதிரி படிச்ச இளைஞருங்க தான் தேவைப்படுறாங்க…நாங்க Open Source எல்லாம் Support பண்ணிறம்.”

“நீங்க பெரிய நிறுவனம் ஆச்சே…நான் எப்படி அங்க எல்லாம்…?”

“அட விடுங்க…இதில் என்ன பெருசு சின்னது எல்லாம்…எங்க நிலமை தெரிஞ்சா நீங்க இப்படி கேட்கமாட்டீங்க…” அழும் நிலையில் இருந்தார்.

“……”

“உங்களுக்கு எங்க வேலை வேணுமோ…அங்கேயே தந்திடுறம். உங்களுக்கு மட்டுமல்ல, இன்னும் எத்தனை பேருக்கு வேலை வேணுமோ சொல்லுங்க…அத்தனை பேருக்கும் தந்திடுறோம்…வந்து எங்களை கரைசேருங்க…”

அழைப்பை துண்டித்து விட்டு ஓடி ஒழிந்தேன்.

“வேலை கிடைத்ததா…” நிற்க வைச்சு கேட்டார்கள்..

“பல இடங்களில் வேலை பற்றி கதைச்சுக் கொண்டிருக்கிறன். உண்மையா அவர்கள் தான் என்னுடன் கதைத்துக்கொண்டிருக்கிறார்கள். வெகுவிரைவில் நல்ல முடிவு கிடைக்கும் என்று நம்பலாம்…”

ELECTION நேரம் சீட் கிடைப்பதும்…RECESSION நேரம் வேலை கிடைப்பதும் ரொம்ப கஸ்டம் தான்…

.

மாற்றம்…தடுமாற்றம்

2009-03-23T19:10:00.002+08:00

“நானும் போகிறேன்….” .

சன் ரீவி சத்தம் குறைந்தது. தலையை நிமிர்த்தினார்..தலைவர். இந்தப் பட்டம் அவர் விரும்பி எடுத்துக்கொண்டது. நாம் கொடுத்தது அல்ல..

இருவர் பார்வைகளும் ஒருவரை ஒருவர் ஊடறுத்தன.

“ஏன்…?” விடைகள் தெரிந்தாலும் கேள்விகள் சில வேண்டுமென்றே கேட்கப்படுவது வழக்கம்..

“எமக்கு ஒரு மாற்றம் தேவைப்படுகின்றது…” விரும்பியே சொல்லும் பொய்களில் இதுவும் ஒன்று..

“ஏன் இந்த தடுமாற்றம்…?” தன் சொல்லாடல் திறமையை மறுபடியும் காட்டுகிறார்..

“அது எம்மிடம் இல்லை…இருந்ததும் இல்லை..இது காலத்தின் கட்டாயம்”.

நெஞ்சை தடவினார். அவர் பார்வையை தவிர்த்தோம். சிறிது நேரம் அமைதி நிலவியது..

“அப்படி என்ன தான் குறை இஞ்ச உங்களுக்கு……?”

நீங்கள் தான் என்று சொல்லிவிடமுடியாது. அடுத்த முறை இஞ்ச வரவேண்டி வந்தாலும் வரும்..

“எங்களுக்கு நீங்கள் செய்த உதவிகளை நாம் என்றும் மறக்கமாட்டோம். அதற்காக எங்கள் நெஞ்சத்தில் உங்களுக்கு என்றும் இடம் உண்டு..ஆனால் களநிலமைக்கு ஏற்ப நாங்கள் சில முடிவுகளை எடுக்க வேண்டி இருக்கு..”.

“அங்க எவ்வளவு ….? “ அந்தக் கேள்வியில் நக்கல் துளித்தது..

“இஞ்சயை விட எவ்வளவோ மேல்….”.

“ஆனா உங்களால அங்க சுயமரியாதையை காப்பாத்த முடியாது…அது அமிழப் போற தோணி..”.

“இஞ்ச மட்டும் என்ன அத காப்பாத்தினனாங்கள் தானே..அதைப் பற்றி கவலைப்பட…”.

“ஒவ்வொரு முறையும் இப்படி தாவுவது…?”.

இடைமறித்த நாம் “இந்த தாவல்கள் தவிர்க்கமுடியாதது..உங்களால் தாவ முடியாது..அதனால் எங்களைப் போன்றவர்களின் தாவல்கள் தான் உங்கள் போன்றவர்களுக்கு வாழ்க்கை தருகின்றது.”.

உண்மை அவருக்கும் உறைத்தது. என்ன தான் இருந்தாலும் இவங்களால அவங்களோட சேரமுடியுமா என்ன. அடிச்சாலும் பிடிச்சாலும் அணி சேர நம்மை போன்றவர்கள் தான் இவர்களுக்கு தேவை...

“வாழ்த்துகள்…பிரிவோம்….”.

“சந்திப்போம்…கல்யாண விழாக்களில்…தமிழர் கூட்டங்களில்….அடுத்த…..”.

கையை குலுக்கினார்..

திரும்பி நடந்தேன். சன் ரீவி சத்தம் கூடியது. திரும்பிப் பார்த்த போது……

.

.என்று சிட்டுவேசன் பாட்டு ஒன்று போய்க்கொண்டிருக்க…எரிச்சலடைந்த அவர் (இனிமேல் அவர் நமக்கு தலைவர் இல்லை) ரிமோட்டை எறிந்து ரீவியை அணைத்தார்.

.

பிற்குறிப்பு: வெளிநாடுகளில் வாடகை வீடுகளில் இருக்கும் நம்மவர்களிடையே நடக்கின்ற சம்பவங்களில் இதுவும் ஒன்று. இந்த உரையாடல்கள் வேறு எதனையாவது ஞாபகப் படுத்தினால் நான் பொறுப்பல்ல. :-)

.

சிங்கை & நீயுசிலாந்து பதிவர்கள் சந்திப்பு - 15.03.2009

2009-03-18T21:20:00.001+08:00

முன்னூட்டம்: தேர்தல் காலத்தில் அதுவும் 3வது அணி சூடாகிக் கொண்டிருக்கையில் இந்த சந்திப்பு நடப்பதில் எந்த நுண்ணரசியலும் இல்லை. நமது அணி மூன்றாவது அணியுமில்லை.

.

சிங்கையில் இப்போது போதாத காலம். பொருளியல் நிலமையில் மட்டுமில்லாமல் காலநிலையிலும் தான். பொருத்த நேரம் பார்த்து மழை கொட்டத் தொடங்கும். அதுவும் சாதாரண மழை கிடையாது. இடி மின்னலுடன் அடைமழை. 2 வாரங்களுக்கு முன் இடி மின்னல் தாக்கி சிங்கை கடல் சிங்கம் (Merlion) சாய்ந்துவிட்டது. இந்நிலையில் கோவியார் பதிவர் சந்திப்பு அறிவிப்பு போட, காலநிலை நம்மை பயமுறுத்தியது. சொன்னாற் போல் நான் வெளிக்கிடும் நேரம் பார்த்து என் பகுதியில் அடைமழை. மழை விடும் வரை பொறுத்திருந்து விட்டு கிளம்பும் போது மணி 4 ஆகிவிட்டிருந்தது. பதிவர் சந்திப்பு வரலாற்றில் முதல் தடவையாக தாமதமாக செல்கிறேன். இதிலும் எந்த நுண்ணரசியலும் இல்லை.

.

பாரதியும் நானும் Raffles Place ஐ சென்றடைத்த போது முன்னால் தூய தமிழில் ஒருவர் செல்பேசியில் உரையாடிக்கொண்டு சென்றார். வேறுயாருமில்லை...முகவை இராம்குமார். அவரின் தூய தமிழ் மழையில் நாமும் நனைந்தோம். இரட்டையர்களான ஜெகதீசனும் விஜய் ஆனந்தும் வாடகை மகிழூந்தில் (டாக்ஸியில்) வந்து கொண்டிருப்பதாக அறிந்தோம். அவர்கள் இப்போதெல்லாம் எங்கே போனாலும் தூய தமிழைக் காக்க வாடகை மகிழூந்தில் தான் பயணம் செய்வதாக முகவை அவர்கள் கருத்து தெரிவித்தார்.

.

இதற்கிடையில் நாம் இன்னமும் சந்திப்பு இடத்தை வந்தடையாததை அறிந்த பெரியவாக்கள், பலர் கடுப்படைந்து செல்பேசியில் அழைத்து கண்டித்தனர். மழை காரணமாக LAU PA SAT எனும் உணவு அங்காடியில் தான் பெரியவாக்கள் எல்லாரும் கூடியிருந்தனர். மகிழூந்தில் இருந்து இறங்கிய விஜய் ஆனந்த் உற்சாகமாக காணப்பட்டார். உத்தியோகபூர்வ புகைப்பட பிடிப்பாளர் ஜெகதீசன் புகைப்பட கருவியை கொண்டு வராமல் வந்து தன் நுண்ணரசியலைக் காட்டினார். ஒருவகையில் இந்தப் பதிவு 3 நாள் தாமதமாக வருவதற்கு இவரும் ஒரு காரணம்..

.

இடையில் முருகேசன் நம்மை தாண்டி அப்பாவித்தனமாக செல்கையில் நம்மால் தடுக்கப்பட்டார். புகைப்பட கவிஞர் இராம், பாதையின் அந்தப் பக்கம் நின்று கைகாட்டினார். அவர் இன்னொரு பதிவரை அழைத்துவர இருப்பதால் மற்றவர்கள் சந்திப்பு நடக்கும் இடத்துக்கு நடக்கத் தொடங்கினோம். விஜய் ஆனந்த் எமக்கு வழிகாட்டினார். அவர் இந்த பகுதியில் தான் வேலை செய்கிறாராம். அதனால் இந்த இடம் பற்றிய மேலதிக தகவல்களை பல பதிவர்கள் விஜயிடம் கேட்டு தெரிந்து கொண்டனர். (உதாரணத்துக்கு, இந்த பாலத்தால் மகிழூந்து போகுமா...இல்லை போகாதா..?, இந்த இந்திய உணவகம் தேறுமா தேறாதா..?)

.

ஒரு வழியாக சந்திப்பு இடத்துக்கு வந்தால் கிட்டத்தட்ட 15 பேர் ஏற்கனவே கூடியிருந்தனர். சந்திப்பு நாயகர்களான துளசி அம்மா & கோபால் ஐயா அவர்கள், கூடவே கோவியார், சிங்கை நாதன், ஜமால், கிரி, ஜோதிபாரதி, பாண்டித்துரை, பிரபு, மீனாட்சி சுந்தரம், யோகன், ஆசிரியர் இளங்குமரன், பாஸ்கரன், சிவராம் முருகன் மற்றும் ஞானசேகரன். தாமதமாக வந்த நம்மை சந்திப்பு நாயகர்களிடம் கோவியார் அறிமுகப்படுத்தி வைத்தார். இந்திய பயணம் முடித்து திரும்பிய புத்துணர்வுடன் கிரி, அறிவுக்களையுடன் ஆராய்வாளர் பாஸ்கரன்,வழமையான போல் சிரித்த வெளிச்ச முகத்துடன் ஜோதிபாரதி, கவிதைச்சிரிப்புடன் பாண்டித்துரை, மீசையுடன் பிரபு, மாப்பிள்ளை கோலத்தில் ஜமால் என்று பழையவர்கள் இருக்க மற்றவர்கள் முதல் நாள் கல்லூரிக்கு வந்த புது மாணவர்கள் போல் அடக்கமாக இருந்தனர்.

.

படம் எல்லாம் நல்லாத்தான் எடுக்கிறார். ஆனா எடுத்த படம் வெளியே வராததன் மாயம் என்ன..?

.

ஒரு வழியாக இராமும் இன்னொரு பிரபல பதிவரும் விரைவில் வந்தடைடைய சந்திப்பு வைக்க பொருத்தமான இடத்தை தேர்ந்தெடுத்து அனைவரும் அமர்ந்தோம். அப்போது சிங்கை கவிதாயினி மாதங்கியும் நம்முடன் இணைந்துகொண்டார். கோவியார் பாரதி ராஜா பாணியில் “என் இனிய தமிழ் வலைஞர் பெருமக்களே...” என்று ஆரம்பித்தது பக்கத்தில் இருந்து போண்டா சாப்பிட்டுக் கொண்டிருந்த விஜய் ஆனந்துக்கு கூட கேட்கவில்லை.

.

கிட்டத்தட்ட 2005 ம் ஆண்டிற்கு பின் முதன்முறையாக 25 பேருக்கு மேல் கூடிய பதிவர்கள் சந்திப்பு இது என்று பழம்பெரும் பதிவர்களான சிங்கை நாதன் (..?) & துளசி அம்மா அவர்களும் கருத்து தெரிவித்தனர். வழக்கம் போல் அறிமுக படலங்கள், கூடவே சிற்றூண்டி பரிமாறல்கள் இடம்பெற்றன. அந்த சிற்றூண்டிகளின் பெயர்கள் என்ன வென்று எனக்கு தெரியவில்லை. ஏதோ உப்புமாவில் சீனி, சீனியில் உப்புமா என்றெல்லாம் ஜமால் கூறியது என் காதில் விழுந்தது. சட்னியில்லாமல் சாப்பிடமாட்டேன் சில பதிவர்கள் அடம்பிடித்தனர்.

.

இது நான் சமைத்த காளான் போண்டா இல்லை..தைரியமா எடுங்கோ...

.

மாலை 6 மணிக்கு நூல் வெளியீட்டு விழா இருப்பதால் கவிஞர்கள் பாண்டித்துரை, ஜோதிபாரதி, மாதங்கி ஆகியோர் கிளம்ப, அதற்கு முன் படப்பிடிப்புகள் நடந்தன. அதனைத் தொடர்ந்து வந்திருந்த இன்னொரு பிரபலமும் விடைபெற மற்றவர்கள் மறுபடியும் அமர்ந்து நம் நிகழ்ச்சி நிரலைத் தொடர்ந்தோம். முதலில் ஆசிரியர் இளங்குமரனின் அறிமுகம். ஆசிரியர் பணியில் இருக்கும் அவர் தான் செய்து வரும் பொதுச்சேவைகளைப் பற்றி கூறினார். தஞ்சாவூரை சேர்ந்த அவர்,சொந்த ஊரில் பொருளாதார நிலையில் பின் தங்கிய 10 குழந்தைகளுக்கு கல்வி வசதிகளை தன் சொந்த செலவில் செய்து வருகிறார். இளநிலைக்கல்வியிலிருந்து பட்டப்படிப்பு வரைக்கும் உதவியிருக்கிறார். தற்போது கல்விக்கூடம் ஒன்றை அமைத்து வறிய குழந்தைகளுக்கு இலவசக்கல்வி அளிக்கும் அடுத்த கட்ட திட்டத்தில் இருப்பதாகவும் தெரிவித்தார். இது பற்றி சக பதிவர்கள் தங்கள் பாராட்டுகள், ஆலோசனைகள், கருத்துக்கள் என்பவற்றை வழங்கினர். ஆசிரியர் இளங்குமரன் போன்றவர்களின் இது போன்ற தன்னலமற்ற முயற்சிகள் வெற்றி பெற வேண்டும்.

.

பதிவர்கள் குழுமம் ஒன்று அமைக்கப்பட்டு ஆக்கபூர்வமான முயற்சிகள் மேற்கொண்டால் அடுத்த தலைமுறைக்கு பிரயோசனமாக இருக்கும் என்று கோபால் ஐயா, மற்றும் இளங்குமரன் ஆகியோர் கருத்து தெரிவித்தனர். அது எவ்வளவு தூரம் சாத்தியமாகும் என்று தெரியவில்லை. இன்னொரு மூன்றாம் கூட்டணியாக நாம் மாற விரும்பவில்லை. பேசாமல் 4ம் கூட்டணியாகவோ (அதுக்கும் சிரஞ்சீவி ஆப்பு வைச்சிட்டார்) இல்லை 44 வது கூட்டணியாக இருந்து விடுகிறோம். நம் கூட்டமைப்பில் எல்லாருமே தொண்டர்கள் தான், யாருமே தலைவர்கள் என்று கிடையாது...(யாரோ கையை தூக்குவது தெரிகின்றது....கைகாரர் ஏன் இஞ்ச வந்தவர்....?)

.

இறுதியாக அப்பாவி முருகேசனால் மிக விரிவான நன்றி நவிலல், மற்றும் துளசி அம்மா அவர்களின் பதிவுலக பயணம் பற்றிய பேச்சு இடம்பெற்றது. அவர் கூறிய பல தகவல்கள் பழம் பெரும் பதிவர்கள் பலருக்குமே ஆச்சரியமாக இருந்ததாம். முருகேசனில் ஒரு நல்ல பேச்சாளருக்கான திறமை தெரிகின்றது.

.

இராம், பாரதி, கோவியார், சிங்கை நாதன், மீனாட்சி சுந்தரம் போன்றோர் புகைப்படங்களை எடுத்து தள்ளினர். ஆனால் எவரும் எனக்கு பதிவில் போட படங்களை அனுப்பி வைக்கவில்லை. அதிசயமாக இராம் தான் எடுத்த்த புகைப்படங்கள் நன்றாக வரவில்லை என்று சொன்னார். அதற்கும் மழைக்கும் ஏதாவது சம்மந்தம் இருக்குமா தெரியவில்லை. நான் புதிதாக சந்தித்த சிவராம் முருகன், யோகன், மீனாட்சி சுந்தரம், ஞானசேகரன் இளங்குமரன் போன்றோருடன் அறிமுகமாகி உரையாடினேன். சிவராம் முருகன், மீனாட்சி சுந்தரம் ஆகியோர் வாசகர்கள் மட்டுமே..ஞானசேகரன் அம்மாஅப்பா என்ற பெயரில் வலைப்பதிவு வைத்திருக்கிறார்.

.

முகவை இராம் தான் இரவு Katong பிள்ளையார் கோவிலில் நடக்கும் கம்பவாரிதி ஜெயராஜின் கம்பராமாயண சொற்பொழிவிற்கு செல்வதாகவும் விரும்புவர்கள் தன்னுடன் இணையலாம் என்றும் அறிவித்தல் தந்தார். கம்பவாரிதியின் சொற்பொழுவுகளை கிட்டத்தட்ட 10 வருடங்களுக்கு பின் கேட்கும் வாய்ப்பு என்னை போ என்று சொன்னாலும், நாளை வேலை வா என்று அழைத்ததால் நான் செல்லவில்லை. முகவையுடன் கோவியார், ஜெகதீசன், விஜய் ஆனந்த் போன்றோர்கள் சென்றார்கள். முகவை எழுதும் கம்பராமயண வெண்பாவிற்கு கம்பவாரிதியின் சொற்பொழுவு உதவக்கூடும். கோவியாரின் சொற்பொழிவு பற்றிய பதிவைப் பார்க்க.

.

ஒரு வழியாக சந்திப்பு 7 மணியளவில் உத்தியோகபூர்வமாக நிறைவு பெற்றது. தொடரூந்து நிலையத்திற்கு இறங்கி நானும் இன்னும் பலரும் மேற்கே போகும் தொடரூந்தில் ஏறி பயணமானோம்.எடுத்த படங்கள் அனுப்ப பலரும் மறந்ததால் பதிவும் தாமதமாக வருகின்றது...

.

JAI HO -ஒரு நுண்ணரசியலும் ஒரு பகிடியும்

2009-03-17T19:22:00.001+08:00

எச்சரிக்கை: தயவு செய்து இந்தப் பதிவை இசைப்புயல் AR ரகுமானுக்கு அனுப்ப வேண்டாம்

.

நுண்ணரசியல்

.

Jai Ho (Music Video remake) from Hasanah Hussien on Vimeo.

.

இது SINGAPORE TEMASEK POLYTECHNIC ன் Diploma in Communications & Media Management மாணவர்களின் கைவண்ணம்.

(வீடியோ தொடுப்பு http://vimeo.com/3576849)

.

பகிடி

.

இது இந்திய ஆளுங்கட்சியின் கைவண்ணம்

.

பிற்குறிப்பு: 2 கணொளிகளிலும் தலைப்பு மாறிப்போடவில்லை என்பதை கவனிக்கவும்.

.

மழையில் இணைந்தே நனைந்தோம்

2009-03-12T19:08:00.001+08:00

வேலை முடிந்தது.

தூறல்கள் தொடங்கியது...

சிங்கையில் மாலைநேரம்..

இப்போதெல்லாம் மழைக்காலம்.

.

கடவையில் பச்சை தெரிந்தது.

நெருங்க சிவப்பு எரிந்தது..

கூடவே மழையும் பெருத்தது.

.

எனக்கோ ஏமாற்றம்....

அரை நொடியில்......

அதில் ஒரு மாற்றம். ...!

.

’கவர்’(த)ந்தது ஒரு குடை..

குடைக்குள் ஒரு மயில்..

எனக்குள் பெரு மழை...

.

பச்சை அழைத்தது..

ந(க)டக்கத் தொடங்கினோம்..

நாகரீகம் காத்தோம்..

நனைதலை அதிகரித்தோம்..

.

உதடுகளில் வினாக்கள்..

கண்களில் விடைகள்...

கலந்தன மனங்கள்..

இணைந்தன கைகள்..

பிறந்தன புதுகதைகள்

தெரிந்தன பலவிடயங்கள்..

.

தொடரூந்து நிலையம்

தொடர்ந்தது பயணம்

.

மஞ்சள் கோடு தெரியவில்லை.

மக்களுக்கு இது புரிவதில்லை.

தொடரூந்து ஊர்ந்து வந்தது.

மழைத்துளிகள் சாரலாக தெறித்தது.

.

சாரல்களின் குளிர்மை..

நமது அண்மை..

பிறந்தது புது வெம்மை.

.

தொடரூந்து தொடர்ந்தது.

தொடர்கதை தொடங்கியது.

விளம்பர இடைவெளிகள் வந்தன.

விசனம் தராமல் கிளம்பின.

.

முடிவு வந்தது.

பிரிவு தந்தது.

மழை தொடரும்....

மயில் கவரும்....

.

. . . . .

நுண்ணரசியல்

தோளில்

புத்தகப் பையில்

பத்திரமாக இருந்தது

என் குடை.

.

இரவு 10 மணிக்கு பறந்து வந்த அந்த இரு.......

2009-03-04T19:27:00.001+08:00

இரவு 10 மணியாகிவிட்டது. நித்திரை கண்களைச் சுழற்ற, விளக்குகளை அணைத்துவிட்டு படுக்கையில் விழுந்தேன். நித்திரை மெல்ல மெல்ல என்னை ஆட்கொள்ளத் தொடங்கிய சமயத்தில் தீடீரென எனக்கு அந்த சத்தம் கேட்டது.

.

திடுக்கிட்டு எழுந்தேன். சற்றே நிதானித்தேன். இது கனவல்ல, நிஜம் தான் என்பதை நிரூபிக்கும் விதமாக மறுபடியும் அந்த சத்தம் கேட்டது. அவைதான்...மறுபடியும் வந்துவிட்டன. எப்படி..? அதான் நாம் எல்லாவற்றையும் அழித்தாகிவிட்டதே...?

.

எம்மிடம் இந்திய ரேடார்களோ, இஸ்ரேல் ஏவுகணைகளோ இல்லாவிட்டாலும் அவற்றை சமாளிக்கும் தாக்குதல் திட்டம் எப்பவும் தயாராகவே இருந்தது.

.

படையணிக்கு கட்டளைகள் பிறப்பிக்கப்பட்டன. திட்டமிட்டபடி விளக்குகளை அனைத்தும் சடுதியாக ஒளிர விடப்பட்டு இரவைப் பகலாக்கினோம். ஆயுதங்களும் தயாராகின.

.

இந்த தீடீர் வெளிச்சங்களை அவையும் எதிர்பார்த்திருக்கவில்லை. சடுதியாக ஒன்று தோன்றி வடகிழக்கு திசையில் மறைந்தது.

.

ஆயுதங்கள் இலக்கை குறி வைத்தன. படையணிகள் களம் புகுந்தன. இலக்கை தவிர்த்து அனைத்தும் வழமை போல் சராமாரியாக தாக்கப்பட்டன.

.

தீடிரென இன்னொன்று எம் பின்பக்கமாக தாழ்வாகப் பறந்து வர, நாம் அனைவரும் பதுங்குநிலை எடுக்க வேண்டிய கட்டாயத்துக்கு தள்ளப் பட்டோம். நம் தாக்குதல்களையும் மீறி எம்மையும் தாண்டி எம் நூலகத்தின் மீது மோதியது. அடுக்குகள் சரிந்தன.அதில் அதுவும் அமிழ்ந்தது. A Kamikaze-style Attack...?

.

ச்சே...இம்முறையும் நாம் கோட்டை விட்டுவிட்டோமே...?

.

ஆத்திரம் மேலிட்டது. கட்டளைகள் பிறப்பிக்கப்பட்டன. மற்றதை விடக்கூடாது...தேடுங்கள்.

.

சற்று நேரத்தில் வடகிழக்கு திசையில் சென்று மறைந்த ”அது” வடக்கு திசையில் சத்தம் போடாமல் நகர்வது நம் கழுகுக் கண்களுக்கு தென்பட்டது. தகுந்த ஆயத்தங்களுடன் அதனை நெருங்கிய நாம் அது தாழப்பறக்க எத்தனித்த போது கிரிக்கெட் மட்டையால் ஒரே போடாக போட்டதில் கேவலமாக நசுங்கியது.

.

Hurray.....!

.

ஒரு வழியாக முதன் முறையாக நாம் ஒரு கரப்பான் பூச்சியை அடித்து வீழ்த்தி விட்டோம். வெற்றிக் களிப்பில் நம் படையணிகள் குதூகலித்தன.

.

நாங்க யாரு...? ஹெற்றப்போலால் ஹெலியையே அடிச்சு விழுத்தினவங்களாச்சே.

.

(ஹெற்றப்போல் - கவண்)

.

எல்லாம் முடிந்த பின் நம் படையணிகளிடம் “அதான் எல்லாத்தையும் அழிச்சிட்டம் என்று தம்பட்டம் அடிச்சியள்..பிறகு அவை எப்படி இண்டைக்கு வந்தது..?” கோபமாகக் கேட்டேன்...

.

“பக்கத்து வீட்டிலிருந்து” என்று பதில் வந்தது.

.

நல்லவேளை “பக்கத்து நாட்டிலிருந்து” என்று சொல்லவில்லை.

.

எது எப்படியோ...இந்த இரண்டையும் அழிச்சிட்டதால இனி ஒன்னும் வராது. சரிந்து கிடந்த என் புத்தகங்களை மறுபடியும் அடுக்கிவிட்டு, அதனுள் மாண்ட “அதை” குப்பைக்குள் அனுப்பிவிட்டு, மறுபடியும் படுக்கையில் விழுந்த போது 11 மணியாகி விட்டிருந்தது.

.

cockroach cartoon என்று கூகிளில் தேடிய போது கிடைத்த படங்களில் இதுவும் ஒன்று..
எழுத்துருக்களின் நிறம் மாறியது தற்செயலாகவே
1, 2 ல் ஒரு நுண்ணரசியலும் கிடையாது)

.

அணைக்கட்டு”மா”...?

2009-03-01T22:05:00.001+08:00

வீட்டில் யாருமே இல்லை.....அவனும் அவளும் மட்டும்தான்..

மழை தொடங்கவில்லை...இடியும் மின்னலும் மட்டும் தான்..

மப்பும் மந்தாரமுமா அவள் வ(வா)னம்..

கிக்கும் கிறக்கமாக அவன் ம(மா)னம்...

.

“அணைக்கட்டுமா...?”

“ம்...” அவளை நெருங்க...

அவளோ விலகி ரிமோட்டை எடுத்து ரீவியை அணைத்தாள்..

அவள் விரலை அவன் பற்ற, வெட்டிய மின்னல், அவள் கண்களிலா, இல்லை வெளியேயா..தெரியவில்லை. ..

விரலை விடுவிக்க அவள் முயன்று வென்று பின் தோற்கும் கணப் பொழுதில்...

முன்னர் வெட்டிய மின்னல் இடியாக இறங்க....

இருவரும் ஒருவரை ஒருவர் அணைக்கட்டிய அந்த மைக்ரோ செக்கனில்..

செல்பேசி சிணுங்கியது....

.

...ச்சே....

.

“அணைக்கட்டு உடைந்தது”

.

(செல்பேசியில் வந்த செய்தியும் அதுதான்..)

.

அரைச்சதம் - Batting & Blogging

2009-02-25T19:17:00.003+08:00

.

நான் கனகாலமாக கிரிக்கெட் பார்த்து வருகிறேன். ஆனாலும் நானும் களத்தில் இறங்கி Batting, Bowling என்று செய்ய விரும்பியதில்லை. Match ஐப் பார்த்தோமா..போனோமா என்று இருந்துவிடுவேன். இருந்தாலும் இலவசமாக கிடைப்பதால் சில Grounds வளைத்துப் போட்டிருந்தேன். இடம் கிடைக்கும் போதே வளைத்துப் போடும் அந்தக் கால புத்திதான்.

.

தொழில்நுட்ப வளர்ச்சியின் காரணமாக இப்போதெல்லாம் கிரிக்கெட் கூட தமிழில் விளையாட முடிகின்றது. சரி இதுக்கு மேல களத்தில் இறங்காவிடில் நான் தமிழனாக இருந்து பயன் என்ன என்று வளைத்துப் போட்ட Ground ஒன்றில் Batting & Bowling பண்ணலாம் என்று நுழைந்து விட்டேன். முதல் ஓட்டத்தை எடுத்த போதே கைதட்டல்கள் கிடைத்தன. பிரமாதமான ஆட்டம் என்று வழமை போல் Commentry எல்லாம் செய்யப் பட்டது. எது எப்படியோ நானும் ஆடுகளத்தில் இறங்கிவிட்டேன், விடப்பட்டேன் என்பது தான் சரி..

.

இப்போதெல்லாம் கிரிக்கெட் உலகளாவிய ரீதியில் பிரபலமாகி வருகின்றது, காரணம் எல்லாத் திக்கிலும் பரந்து வாழும் நம் தமிழர்கள். ஒவ்வொருவரும் திறமையாக வித்தியாசமான பாணியில் ஆடுகின்றனர். சென்னை, கோவை, நெல்லை, மதுரை, யாழ்ப்பாணம், கல்முனை, லண்டன், போஸ்டன், சுவிஸ், சிங்கப்பூர், மலேசியா என்று variety of styles. என்னுடைய Batting & bowling style ஐ விட என் Ground ன் பெயரே பலரையும் கவர்ந்துள்ளதாக தெரிகின்றது. அதுவே நான் நிலைத்திருக்கவும் உதவுகின்றது.

.

பொதுவாகவே எனக்கு அதிரடயாக batting ஆடிப் பழக்கம் இல்லை. Bowling கூட சாந்தமாக அதேவேளை சாதூரியமாகத் தான் போடுவேன். சில வேளைகளில் யாருமே இல்லாத போது கூட ஆடுகளத்தில் களம் இறங்கியிருக்கிறேன். ஆனாலும் பார்த்துவிடுகிறார்கள். காரணம் ஊடகத் துறையினர்..

.

ஒவ்வொரு ஊரிலும்/இடத்திலும் இருக்கும் இப்படிப்பட்ட கிரிக்கெட் ஆட்டக்காரர்கள் மாதம் ஒரு முறை கூடி கிரிக்கெட் ஆடுவார்கள். பொதுவாகவே ஒவ்வொரு ஊரிலும் அந்த ஊர்க்காரரே பெரும்பான்மையாக இருப்பர். ஆனால் சிங்கப்பூரில் எப்படி கணினி, பொறியியல் துறைகளில் வெளிநாட்டவர் சதவீதம் அதிகமோ அதை விட அதிகமாக கிரிக்கெட் விளையாடுபவர்களிலும்.

.

நான் அந்த கிரிக்கெட் போட்டிகளுக்கு போகத் தொடங்கியதில் இருந்து எனக்கு நிறைய நண்பர்கள் கிடைத்தார்கள். அதிரடியாக ஆடுபவர்கள், கவித்துவமாக ஆடுபவர்கள், மொக்கையாக மட்டுமே ஆடுபவர்கள், commentry மட்டும் செய்பவர்கள், commentry செய்யச் சொன்னால் சிரித்துக் கொண்டிருப்பவர்கள், போட்டிகளை பார்க்க மட்டும் செய்பவர்கள், என்று பலவகையானோர் உண்டு. கூடவே எங்கள் கிரிக்கெட் ஆட்டத்தை காண அபூர்வ பறவைகள் வருவதும் உண்டு.

.

சில பேர் ஆடும் ஆட்டத்துக்கு 100, 200 என்றெல்லாம் விமர்சங்கள் வருவதுண்டு. இன்னும் சிலரோ அதிரடி ஆட்டத்தில் records எல்லாம் உடைத்திருக்கிறார்கள். பல கிரிக்கெட் ஆட்டக்காரர்களின் கனவான விகடன் இணைய கெளரவம் எல்லாம் சிலருக்கு கிடைத்துள்ளது. அவர்கள் என்னைப் போன்ற புதுமுகங்களுக்கு பட்டாம் பூச்சி பிடித்து தந்து உற்சாகம் எல்லாம் ஊட்டினர்.

.

பழையன கழிதலும் புதியன புகுதலும் என்ற வழமைக்கேற்ப பல பழையவர்கள் ஓய்வெடுத்தாலும், புதியவர்கள் பலர் வருகின்றனர், கலக்குகின்றனர். ஒரு முனையில் சச்சின் அதிரடியாக ஆடி சதம் அடிக்கும் போது மறுமுனையில் தோள் கொடுத்து துணையாக பொறுமையாக ஆடும் டிராவிட் போடும் அரைச்சதம் காணாமல் போவதில்லை. நானும் தான்.....

.

இண்டர்நெட்டும் (Internet) ஒருவகையில் கிரிக்கெட் (Cricket) ஆட்டம் தான். இரண்டுமே பொழுது போக்காக ஆரம்பிக்கப்பட்டு பிழைப்பாக மாறியிருப்பவை. பில்லியன்களில் புரளும் வியாபாரம் இரண்டிலும் உண்டு. இரண்டுமே சோம்பேறித் தனத்தையும் வளர்க்கின்றன. கிரிக்கெட்டில் Batting என்றால் இண்டர்நெட்டில் Blogging. அங்கே Bowling என்றால் இங்கே Posting (தமிழில் கூட அழகாக பதிவு, பந்து). Commentry - Comment (வர்ணனை - கருத்துரை). அங்கே போட்டிகளை பார்க்க உள்ள ரசிகர்கள் இங்கே பதிவுகளை படிக்க வும் உண்டு. அங்கே கிரவுண்ட் (Ground) இங்கே பிளாக்கர்(Blogger). ஊடகங்களின் பரப்புரையை இங்கே திரட்டிகள் செய்கின்றன. கிரிக்கெட்டில் Twenty20 பண்ணும் புதுமையை Twitter கூட பண்ணுகின்றது.

.

கி(ல்)லியூட்டும் இரு கொலைவெறிக் கனவுகள்

2009-02-18T20:58:00.001+08:00

"இந்தக் கனவில் வரும் சம்பவங்கள், இடங்கள், பெயர்கள் எல்லாம் கற்பனையே. யார் மனதையும் புண்படுத்தும் எண்ணம் இல்லை. எல்லாம் சும்மா பகிடிக்குத் தான்”

மதுரையைச் சேர்ந்த சண்முகப்பாண்டியனும் கொழும்பைச் சேர்ந்த ஆனந்தியும் 2 வருடங்களாக காதலிக்கின்றனர். சிங்கப்பூருக்கு படிக்க வந்தபோது கண்களால் கலந்து மனத்தால் இணைந்து விட்டனர். அப்படியே இரு வீட்டாரையும் இணைப்பதற்காக இருவரும் விடுமுறைக்கு தத்தமது சொந்த இடம் செல்லும் போது தம் விடயத்தை குடும்பத்திடம் சொல்ல உள்ளனர்.

.

. . . . . . . . . . . . . . . . . . . . .

.

மதுரை: சண்முகப் பாண்டியன் வீடு

.

வெள்ளையும் சொள்ளையுமாக துடப்பக்கட்டை தும்புக்கணக்காக மீசையுடன் ஒரு பெரிசு ஊஞ்சலில் இருந்து பேப்பர் படிச்சுக் கொண்டிருக்கின்றது. சுத்திவர பத்து பதினைஞ்சு விருமாண்டிகள். முன்னால ஒரு வேலையாள் அருவாளை சீமென்ற் தரையில் தேய்ச்சிட்டு இருக்கான்.

.

“ஏலே அருவா தீட்டிட்டியாலே...” பெரிசு பேப்பரை இறக்கி சத்தமாக கேட்டது.

.

“ஆமாங்க...” பணிவாக குனிந்தவாறே வேலையாள் அருவாளை பெரிசுடம் நீட்டினான்.

.

அருவாளை வாங்கித் தடவிப்பார்த்த பெரிசு, கண்ணிமைக்கும் நேரத்தில் அருவாளை வீச அந்த வேலையாள் உடல் முண்டமாகி கீழே விழுந்தது.

.

“பய நல்லாத்தான் தீட்டியிருக்கான்..”

.

சுத்தவர இருந்த விருமாண்டிகள் உடலை அப்புறப்படுத்த தொடங்கியிருந்தனர்.

.

உள்ளே பார்வையைத் திருப்பிய பெருசு..”ஏலே மீனாச்சி..”

.

“என்னங்க” உள்ளேயிருந்து குரல் கேட்க..

.

அருவாளை முதுகில் சொருகியவாறே பெருசு “பயல் வர்றானுமுல்ல..ஏர்போர்ட் போயி வந்துர்டன்..திரும்பி வரப்ப கடா ரெடியா இருக்கனும்..”.

.

“சரிங்க..”

.

. . . . . . . . . . . . . . . . . . . .

..

கொழும்பு: கட்டு நாயக்க சர்வதேச விமான நிலையம்(உண்மையில் இது கொழும்பில் இல்லை, கம்பஹா என்ற இன்னொரு மாவட்டத்தில் தான் உள்ளது)

.

விமானத்தில் இருந்து இறங்கிய ஆனந்தி குடிவரவுப் (Immigration) பணிகளை முடித்துக்கொண்டு, அப்பா கேட்ட 2 Black label போத்தல்களையும் சுங்க வரியில்லா (duty free) கடைகளில் வாங்கிக் கொண்டு, தன் உடமைகளையும் எடுத்துக்கொண்டு பொதிதள்ளு வண்டியை தள்ளத் தொடங்கியபோது தூரத்தில் கண்ணாடிக்கப்பால் அவள் அப்பா தேவராஜன் தென்பட்டார். அதென்ன அவர் கையில் ஏதோ கறுப்பாக...? செல்போனா....? இவ்வளவு பெரிசா இருக்கே...? அய்யோ துவக்கு (துப்பாக்கி)......

.

ஆனந்தி ஆச்சரியத்துடன் அவரை நோக்கி கையசைக்க, மகளைக் கண்ட தேவராஜனும் மகிழ்ச்சியுடன் கையசைச்சு

.

“பிள்ள ஆனந்தி இப்படி வா...”. அழைத்தார்.

.

குறுக்கே நின்ற இளைஞன் தேவராஜனின் கையில் இருந்த துவக்கை பார்த்து பயந்து ஓடினான். ஒரு கையில் துவக்குடன் கையை ஆட்டிய அப்பாவைப் பார்த்த ஆனந்திக்கு அடக்க முடியாமல் சிரிப்பு வந்தது. சிரித்துக்கொண்டே அப்பாவை நெருங்கின ஆனந்தி

.

“என்னப்பா இது..? நல்லூர் திருவிழாவில தம்பிக்கு வாங்கின விளையாட்டு துவக்கே இது...? ஹா ஹா..உத ஏன் இப்ப இஞ்ச கொணர்ந்தனீங்கள்....?

.

ஆத்திரமான தேவராஜன்..” எடியே விசரி....இது உனக்கு விளையாட்டு துவக்கோ...இதைப் பற்றி உனக்கு தெரியேலை..பொறு வாறன்..நான் யார் என்று காட்டுறன்..”

.

சுத்த வர திரும்பிப் பார்த்த தேவராஜன் அருகில் காவலுக்கு ஒரு ஆர்மிக்காரன் நிற்பதைப் காண, அவனை நோக்கி குரல் கொடுத்தார்.

.

“அடேய் பொடி மல்லி...” (அடேய் சின்னப் பெடியா..)

.

அவனும் திரும்பி இவரைப் பார்க்க..

.

“எண்டகோ.....” (இஞ்ச வா)

.

அவனும் தேவராஜன் அருகே வந்து “மொக்கத மாத்தையா..?” (என்ன அண்ணா/பெரியவரே)

.

கேட்டு முடிப்பதற்குள் “டூமில்” என்ற சத்தம் கேட்க ஆனந்தியும் அனைவரும் காதைப் பொத்திக்கொண்டு குனிந்தனர். அந்த ஆர்மிக்காரன் சுருண்டு விழுந்திருந்தான்.

.

துப்பாக்கி முனைக்கு முத்தம் கொடுத்த தேவராஜன் அதிர்ச்சி அகலாத தன் மகளைப் பார்த்து “பாத்தியா....இது விளையாட்டு துவக்கு இல்லை...., சரி வா போவம். அங்க அம்மா இடியப்பம், கொளுக்கட்டை எல்லாம் அவிச்சு வைச்சுக்கொண்டு காத்திருப்பா..”

.

. . . . . . . . . . . . . . . . . . . . .

.

“ஆனந்தி... நான் நேற்று ஒரு கனவு கண்டன்...”

.

“மெய்யே....நானும் ஒரு கனவு கண்டனான் தெரியுமோ...சண்..”

.

“என்ன மதுரையா..?”

.

“அங்க என்ன கொழும்பா..?”

.

இருவரும் விழுந்து விழுந்து சிரிக்கத் தொடங்கினர்.

.

. . . . . . . . . . . . . . . . . . .

கதை & திரைக் கதை :- புரூஸ் லீ

வசனம் & பதிவு :- டொன் லீ

.

McRitche ல் சிங்கைப் பதிவர் சந்திப்பு - 14.02.2009

2009-02-15T17:26:00.001+08:00

.

அய்யங்கார் மற்றும் பலரும் வந்தடைந்துவிட்டதாக தகவல் வர நாம் மீண்டும் வந்த இடத்துக்கு திரும்ப தொடங்கினோம். வரும் போது வந்த நீர்த் தேக்க ஓரப் பாதையைத் தவிர்த்து காட்டுக்குள்ளால் நடக்கத் தொடங்கினோம். கிட்டத்தட்ட ஒரு 20 நிமிடங்கள் நடந்து வந்த இடத்துக்கே திரும்பினால், அங்கே நம் சக பதிவர்கள் கோவி கண்ணன், யூசுப் பால்ராஜ் அய்யங்கார், ராம், பாண்டித் துரை, ஜோதிபாரதி, பாஸ்கரன் வந்திருந்தனர். கூடவே சில உண்மையான குரங்குகளும்.

.

இடையே என் நண்பரும் முன்னாள் பதிவருமான அந்த பிரபலம் தானும் சந்திப்புக்கு வந்து கொண்டிருப்பதாக செல்பேசியில் அறிவிக்க, நான் போய் அவரை அழைத்து வர சென்றேன். கிட்டத்தட்ட நமது பதிவர்கள் எல்லாம் களத்தில் குதிக்கும் முன்பே 2003-4 ல் பதிவுலகத்தில் முத்திரை பதித்து அதனால் அவரது நண்பர்களால்(என்னையும் சேர்த்து) திட்டு வாங்கி பின் சில பல காரணங்களால் பதிவுலகத்தில் இருந்து விலகி இருப்பவர். அவரது பெயர்/படம் அவர் விருப்பப்படி தவிர்க்கப் படுகின்றது. அப்படியே விஜய் ஆனந்தையும் இடையில் பார்க்க அவரையும் அழைத்துக் கொண்டு உள்ளே சென்றோம்.

.

என்ன பண்ணிறேள்...?

.

நாம் எங்கே குரங்குகளிடம் கோக்கை பறிகொடுத்தோமோ அங்கே பதிவர்கள் எல்லாரும் கூடியிருந்தனர். அங்கே கூட்டம் நடத்த நாம் விரும்பாததால் நாம் மறுபடியும் முன்பக்கமாக பின்வாங்கினோம். இது தந்திரோபாயமான பின்வாங்கல் மட்டுமே. திரும்பி வரும் போது வழியில் பிரியமுடன் பிரபுவைச் சந்தித்தோம். அவரையும் அழைத்துக் கொண்டு, சந்திப்புக்கு பொருத்தமான ஒரு இடத்தை தெரிவு செய்து அமர்ந்து கொண்டோம்.

.

சுபநேரத்தில் கூட்டம் அய்யங்காரின் வரவேற்புரையுடன் ஆரம்பமானது. என் பதிவுகள் பற்றி சில சந்தேகங்களை அய்யங்கார் கேட்டார். அதற்கு நான் தகுந்தமுறையில் பதில் அளிக்கவே அவர் திருப்தி அடையாமல் நிகழ்ச்சி நிரலின் அடுத்த கட்டமாக அறிமுக படலங்கள் நடைபெறும் என்று அறிவிக்க, முதலில் அந்த முன்னாள் பிரபல பதிவர் ஆரம்பித்தார். அவர் பற்றிய தகவல்கள் இத்துடன் தணிக்கை செய்யப் படுகின்றது.

.

அடுத்ததாக பிரியமுடன் பிரபு. எல்லாரையும் போல் தானும் வலைப்பூ வாசிப்பதில் தொடங்கி அதை தானும் எழுதிப் பார்த்தால் என்ன என்ற விருப்பத்தில் களத்தில் குதித்ததாக தெரிவித்தார். அப்படியே தன் வேலை அனுபவங்களையும் பகிர்ந்து கொண்டார். அவரையும் நம் குழுமத்தில் இணைத்துக் கொள்வதில் பெருமிதம் அடைகின்றோம். ஒவ்வொரு முறையும் விதவிதமாக அல்வாவுடன் ஆஜராகும் செந்தில் நாதனைக் இன்னும் காணவில்லையே என்று பலரும் கேட்டபோது “பாகற்காயில் அல்வா செய்யமுடியாத காரணத்தால்தான் அவர் வரவில்லை” என்று சிலர் காரணம் சொன்ன போதும், ”வேலை நிமித்தம் தான் அவர் வர வில்லை” என்று அவரின் குழும நண்பரான விஜய் ஆனந்த் கருத்து தெரிவித்தார். அவர் ஓவ்வொரு முறை கலந்து கொண்டு தரும் அல்வா போலவே இம்முறை அவர் கலந்து கொள்ளாமல் தந்த அல்வாவும் ருசித்தது.

.

அல்வா போச்சே....? திரைப்பட போஸ்டர்...?

.

இடையிடையே குரங்குகளின் ஊடுருவல் இருந்த போதும், நாம் அவற்றை வெற்றிகரமாக துரத்தி அடித்தோம். கோவி கண்ணன் அவற்றை படம் எடுக்க முயன்ற போது அவை பயந்து ஓடியது குறிப்பிடத் தக்கது. ராம் தன் கமெராவுக்கு நன்றாக வேலை கொடுத்துக் கொண்டிருந்தார். பாண்டித் துரை, ஜமால், பிரபு, ஜோதிபாரதி ஆகியோர் சிங்கை தமிழ் உலகு பற்றி கருத்து தெரிவித்துக் கொண்டிருந்தனர். வழமை போல் பல்வேறு விடயங்கள் ஆராயப்பட்டன. நமது சிறப்பு விருந்தினர் பலரதும் கேள்விகளுக்கு பதில் அளித்துக் கொண்டிருந்தார். பாஸ்கரன் ஒரு தகவல் களஞ்சியம் போல் பல தகவல்களை எல்லாருக்கும் அள்ளி வழங்கினார்.

.

சர்க்கார் -3 ..? (பாண்டித்துரை & பாஸ்கரன்) இவர் தான் ஜெகதீசன் (என்ன ஒரு வில்லத் தனம்..?)

.

காதலர் தின சிறப்புரை ஆற்ற வருமாறு விஜய் ஆனந்த், மற்றும் எனக்கு விடுத்த அழைப்பை நாம் நிராகரித்தோம். கோவியார் தான் மேற்கொண்ட உலக பதிவர் சுற்றுலாக்கள் பற்றி கருத்து தெரிவித்தார். இதுவரை அது பற்றி 9 பதிவுகள் போட்டு விட்டதாகவும் இன்னும் 6 பதிவுகள் வரும் வாரம் போடவுள்ளதாகவும் தெரிவித்தார். ஜமால் தான் போடும் பதிவுகளுக்கு (வலைச்சரத்தில் போட பதிவுகளுக்கும்) பலர் பின்னூட்டம் போடவில்லை என்று அழுதார். அய்யங்காரை மையமாக வைத்து இந்த குற்றச்சாட்டு எழுந்தாலும் அய்யங்கார் தான் அலுவலகத்தில் வேலை மட்டும் பார்க்க முடிவதாகவும் இரவு வீட்ட வந்து பருப்புக் கறி வைக்கவே நேரம் இருப்பதாகவும் சொன்ன காரணத்தை பலரும் மனப் பாடம் பண்ணிக் கொண்டனர்.

.

வழமை போல் உரையாடல்கள் தொடர்ந்து கொண்டிருந்தது. கோவியார் நமக்காக கேக்கும், பயறில் ஒரு திண்பண்டமும் (பெயர் மறந்து விட்டிருந்தது) கொண்டு வந்திருந்தார். அதைச் சாப்பிட்டவாறே நம் வேலையைத் தொடர்ந்தோம். விஜய் ஆனந்த் ”நாம் ஒரு கிரிக்கெட் அணி பதிவர்கள் சார்பில் தொடங்கலாம்” என்று தெரிவிக்க நான் அதை வழிமொழுந்து “நாம் IPL போட்டிகளில் கூட பங்குபற்றலாம். Ambassador ஆக அசினையோ இல்லை இலியானாவை போட்டால் போதும்” என்று கூற விஜய் ஆனந்த் மகிழ்ச்சியடைந்தார். அவர் விக்கட் காப்பாளராகவும் கெப்டனாகவும் இருப்பாராம். வெகுவிரைவில் சிங்கையில் பல அடுக்குமாடி வீடுகளின் கண்ணாடி உடையும் அபாயம் தெரிகின்றது.

.

இடையே ஒரு குரங்கு வெற்றிகரமாக தட்டில் இருந்த கேக்கை புடுங்கிக் கொண்டு கம்பத்தில் ஏறிவிட, அந்த கேக்கை மீண்டும் கைப்பற்றாமல் விடமாட்டேன் என்று கோவியார் கிளம்பினார். ஆனால் நம் சந்திப்பு முடியும் வரை அந்த குரங்கு கீழே வரவே இல்லை. அவ்வப்போது குரங்குகளின் அத்துமீறல் இருந்தாலும் சந்திப்பு தொடர்ந்து நடைபெற்றது. அய்யங்கார் தான் பதிவர் சந்திப்புக்கு காரில் வந்ததாக மீண்டும் நினைவூட்டினார். ஆனால் அந்தக் காரை பற்றி யாருக்கும் தெரியாது.

.

கமெராக் கவிஞர் தன் புன்சிரிப்புடன் & பதிவர்கள் (ஜமால் படம் எடுக்கிறார், ஜெகதீசன்ம & விஜய் ஆனந்த் காணாமல் போய்விட்டார்கள்

.

6.30 மணியளவில் சந்திப்பு உத்தியோகபூர்வமாக நிறைவு பெற குழும படங்கள் எடுத்துக் கொண்டோம். அப்படியே சில பதிவர்கள் ”நாளைக்கு சண்டே..நான் இப்ப வீட்ட போகாவிட்டில் இண்டைக்கே சண்டே...” என்று சொல்லி கிளம்ப மிச்ச சொச்சம் எல்லாரும் லிட்டில் இந்தியாவிற்கு இட்லி கடை நோக்கி பயணமானோம். சந்திப்புக்கு வரமுடியாமல் இருந்த கிஷோர் அங்கே வந்து சந்தித்தார். இட்லியுடன் என்ன சாப்பிட்டோம், என்ன குடித்தோம் என்பவை நிகழ்ச்சி நிரலில் இல்லாத படியால், சந்திப்பு பற்றிய விபரணங்கள் இத்துடன் நிறைவு பெறுகின்றது.

.

படங்கள்: ராம், பாரதி, ஜெகதீசன், கோவி கண்ணன்

.

McRitche பதிவர் சிற்றுலா 14.02.2009

2009-02-15T12:55:00.001+08:00

.

ஏற்கனவே திட்டமிட்டபடி நான், பாரதி (நிஜமா நல்லவர்), ஜெகதீசன், முகவை ராம், மற்றும் ஜமால் ஆகியோர் பதிவர் சந்திப்புக்கு முன்பே உள்ளே ஒரு சிற்றுலா செல்ல திட்ட மிட்டிருந்தோம். மொத்த TRIAL கிட்டத் தட்ட 11KM. 3 மணி நேரத்தில் அதனை முடிக்க முடியாது என்பதால், கிட்டத்தட்ட ஒரு 2.5 KM தூரம் நடந்து வரலாம் என்று முன்னரே திட்டமிட்டிருந்தோம். நானும் பாரதியும் சரியாக 12 மணிக்கெல்லாம் அங்கே சென்றடைந்து விட்டோம். ராமும், ஜெகதீசனும் 12 .30 அளவில் வந்தடைய, தட்டித் தடவி ஒருமாதிரியாக ஜமால் 1.30 க்கு வந்தடைந்தார்.

.

மற்றவர்களுக்காக காத்திருந்த நேரங்களில் எம் கமெராக்களுக்கு வேலை கொடுத்தோம். பாரதி மினக்கெட்டு படங்களாக எடுத்துத் தள்ளினார். ஒரு அழகிய மரத்தையும் அதில் இருந்த அழகான பூக்களையும் படமாக எடுத்து தள்ளினோம். அப்போது சற்றுத் தொலைவில் 4 ஆபூர்வ பறவைகள் எங்களுக்கு தரிசனம் தந்தன..இந்த சந்தர்ப்பத்தை தவறவிட்டதாக நம் கமரா கவிஞர் ராம் கண்ணீர் விட்டார்.

.

ஜெகதீசன்,முகவை ராம் ஆகியோர் குளிர்பானம், திண்பண்டங்கள் என்று பெரிய பொட்டங்களாக கட்டிக் கொண்டு வந்தது காட்டுக்குள் இருந்த குரங்குகளுக்கு அவர்களின் உளவுத்துறை மூலம் தகவல் தெரிந்து விட, குரங்கள் கொஞ்சம் கொஞ்சமாக நம்மை நோக்கி படையெடுக்க தொடங்கின. நாம் முதலில் ஏதோ “பதிவர் சந்திப்புக்கு வந்த குரங்கள் தாம் போல்” என்று இருந்தால் நம் ஐயிட்டங்களை அவை கவர முயற்சிக்க, நாம் பதில் தாக்குதல் நடத்தி அவைகளை துரத்தி அடித்தோம்.

.

படங்களை கலைநயமாக எடுக்கிறம் என்று ஆளுக்கால் மதில் மேல் இருந்து குதிச்சு, கீழே விழுந்தெல்லாம் படங்கள் எடுத்துக் கொண்டோம்.கரையில் ஒரு சிறு ஆமையை கூட விட்டு வைக்கவில்லை. ஆனால் முந்தைய சந்திப்பில் வெட்டுக் கிளிக்கு நடந்த கதை ஆமைக்கு நடக்காமல் ஆமையை நீர்த்தேக்கத்தில் விட்டு விட்டோம். அந்த ஆமையை சில சீனர்கள் பொரியல் போட ஆயத்தமாக நின்றது குறிப்பிடத் தக்கது.

.

ஒரு வழியாக சிற்றுலாவை ஆரம்பித்தோம். முன்னாடியே சென்ற ஜமாலும், முகவை ராமும் குரங்குகளின் அதிகாரபூர்வ வாசஸ்தலத்துக்கு அருகே காத்திருந்த போது குரங்களால் கொரில்லா பாணித்தாக்குதல் நடத்தப்பட்டது. அந்த நேரம் நானும் ஜெகதீசனும், பாரதியும் வேறு சில குரங்களை படம் பிடித்துக் கொண்டிருந்தோம். இந்தத் தாக்குதலை எதிர்பாராத ஜமாலும் முகவை ராமும் கையில் இருந்த கோக் போத்தலை கைவிட்டு விட்டு தந்திரோபாயமாக பின்வாங்கினர். காட்டுக் குரங்கு கோக் போத்தலை திறக்க தெரியாமல் திண்டாடியது. ஒரு மாதிரி கடிச்சு குதறி ஓட்டை ஒன்றை போட்டு விட நுரை தளும்பி இருந்த கோக் பிசிறி அடித்து கிளம்ப முதலில் பயந்து ஓடிய குரங்கு பின் தயங்கியவாறே வந்து அந்த கோக்கை அருந்தியது. குரங்கிற்கு உணவிடுவது பார்க்கில் தடைசெய்யப்பட்டுள்ளது (தண்டப் பணம் 5000 வெள்ளிகள்). அது குரங்கு நம் உணவை பறித்தாலும் பொருந்துமா என்று தெரியாதலால், நாம் அந்த இடத்தில் இருந்து நாம் ஒதுங்கினோம். அந்த குரங்குகள் அந்த கோக் போத்தலை வைச்சு போட்ட ஆட்டத்தை காண பெருந்திரளான மக்கள் கூடியதை நாம் தூரத்தில் இருந்து அவதானித்த போது “பேசாமல் ரிக்கற் போட்டிருக்கலாமோ..” என்று நினைத்து வருந்தினோம்.

.

சிற்றுலா தொடர்ந்தது. பதிவர்கள் மரத்தில் ஏறி எல்லாம் போஸ் கொடுத்தனர். ஒரு போட்டோ எடுப்பதற்கு சில சமயங்களில் சில மணித்தியாலங்கள் எல்லாம் செலவிட்டனர். அப்போது தான் விளங்கியது பாலா எல்லாம் ஏன் படம் எடுக்க 3 வருசம் எடுக்கிறார் என்று. அந்த விபரீத முயற்சிகளை எல்லாம் இங்கே பார்க்கவும்.

.

இடையிடையே நம்ம அய்யங்கார் செல்பேசியில் அழைத்து ”Mcritche க்கு எப்படி வருவது” என்று அறிவுபூர்வமாக கேள்விகள் எழுப்பி எங்கள் சிற்றுலாவை தடங்கல் செய்தார். தான் காரில் வருவதாகவும், அதற்கு வழி காட்டுமாறும் கேட்டுக் கொண்டார்.” McRitche க்கு எது Landmark ” என்ற அவரின் அடுத்த கேள்விக்கு ”Mcritche தான் landmark” என்றெல்லாம் நாம் பதில் கூறி கடுப்படித்தோம். 3.40 மணிக்கெல்லாம் மறுபடியும் அழைத்த அவர் தான் ”காரில் McRitche வந்துவிட்டதாகவும் காரை உள்ளே விடமாட்டேங்கிறாங்கள்” என்று அலுத்துக் கொண்டார். நாமும் பதிலுக்கு “காரை car park ல் தான் விடனும். உள்ள பார்க்கில் எல்லாம் விடமாட்டாங்கள்” என்று கூறினோம். அப்போது நாம் நடுக்காட்டில் 2.5 KM க்கப்பால் இருந்தோம். தான் காரில் வந்து இறங்கிவிட்டதாக அவர் சொன்னதை நாம் பார்க்க முடியாமல் போய் விட்டது. அது அவருக்கு ரொம்ப செளகரியமாகிவிட்டது.

.

மேலும் சக பதிவர்கள் பலரும் வந்தடைய தொடங்கிவிட்டதாக தகவல் வர 2.5 km நடந்து முடிந்திருந்த நாமும், திரும்ப தொடங்கினோம். வழியில் குரங்களில் தாக்குதல் நடந்த இடத்தில் குரங்குகளைக் காணவில்லை. கோக் போத்தலின் லேபல் மாத்திரம் மிச்சமாக கிடந்தது.

.

அடுத்த பதிவில் சந்திப்பு விபரங்கள் தொடரும்.

.

இது ஜெகதீசன் தான்

.

February 14: சிவா & Jenni

2009-02-13T22:20:00.001+08:00

.

சிவாவிற்கு இப்போதெல்லாம் தலைவலி அடிக்கடி வருகின்றது. வேலையிடத்தில் மனேஜர் 6 மணிக்கு மேல் நின்று Yield Report ஐ அனுப்பி விட்டு போ என்கிறார். ஆனால் Yield Data வெளியாக 7 மணியாகிவிடும். Jenni யோ 5.20 க்கெல்லாம் பக்கத்தில் வந்து இன்னிக்கு Takashimaya, Plaza Singapura போகலாம் என்று கடுப்படிக்கிறாள். வீட்ட அம்மா “ஏன் லேட்டாக வாறாய்” என்று கேட்டால் “வேலை” என்றும், “ஏன் இப்படி 5.30 என்றால் வேலையை முடிக்காமலே ஓடுகிறாய்” என்று மனேஜர் கேட்டால் “Mummy Boss" என்றும் பொய்கள் சொல்ல வேண்டி இருக்கு. Jenni இடம் மட்டும் எந்த பொய்யும் சொல்ல முடிவதில்லை.Senior HR Admin மட்டுமில்லை, சிவாவின் வருங்கால வீட்டு Admin ம் அல்லவா..? 5.30 வரைக்கும் office duty, 5.30 க்கு மேல் beauty (Jenni) உடன் duty.

. . . . . . . . .

.

இன்று Friday 13th. நாளை பெப்ரவரி 14. காதலர் தினமாம். எல்லாரையும் போல் சிவாவும் Jenni உம் அரை நாள் போட்டு விட்டனர். காதலர் தினத்தை கொண்டாடாவிட்டால் காதலர்களா இருப்பதற்கு, இருந்ததற்கு அர்த்தம் இல்லையாம். முந்த நாள் வானொலியில் காதலர் தினத்துக்கு எப்படியான பரிசுகள் தரலாம் என்று ஆலோசனைகள் வேற. இப்ப சிங்கப்பூரில் ஓர்ச்சர்ட்க்கு (orchard) க்கு அடுத்த படியாக Jurong Point தான் பரிசுகள் வாங்க சிறந்த இடமாம். பெண்களுக்கு designer handbags, Jewells, மற்றும் ladies accesseries கொடுக்கட்டுமாம். ஆண்களுக்கு phone accessories, Gadgets, போன்ற Technical stufss. போன் கொடுப்பது என்றால் IPHONE, Samsung Omania, LG கொடுக்கட்டுமாம். நல்ல வியாபாரம் தான் போங்கோ.

எப்பவும் இப்படி இருக்கோனும். அதான் காதல்.

.

காதலர் தினத்தில் ஆண்கள் அன்பை பரிசாக எதிர்பார்க்கும் அதேவேளை பெண்கள் பரிசுகளை அன்பாக எதிர்பார்க்கிறார்களாம். அன்பு ---> பரிசு..இல்லை பரிசு --->. எப்படியோ வாழ்க்கையில் அன்பு இருந்தா சரி. கொடுக்கிற பரிசு விலையைக் காட்டிலும் அன்பை அதிகமாக வெளிக்காட்டினால்..காதல் என்றென்றும் இனிக்கும்.

. . . . . . . . .

Jenni உடன் duty முடிஞ்சு , அவரை வழியனுப்பிய சிவா, Jurong Point க்குள் நுழைந்தால் கூட்டமோ கூட்டம். அந்தக்கூட்டத்தில் சிவாவின் நண்பன்..அவனும் சிவா தான்.

.

“அடேய் சுவா (Chua)...” அவன் அழைத்தான்.

.

பல சீனர்கள் திரும்பிப் பார்த்தனர். நக்கலடிக்கிறான்.....:-)

.

“ஹாய் சிவா”ஜி”...இது சி(சு)வாவின் பதிலடி.

.

சிவா Jenni ஆல் சுவா (chua) ஆன மாதிரி, இந்த சிவா Ani (Anitha Agarwal) ஆல் சிவா”ஜி” ஆகிவிட்டார்.

.

சி(சு)வாவும் சிவா”ஜி” யும் சும்மா கதைச்சுப் போட்டு, தாம் வந்த வேலையில் இறங்கினர்.

.

பி.கு. 1 : சி(சு)வா SJ என்ற initail பொறித்த பெண்டன்(டொலர்) கொண்ட பிளாட்டினம் செயினை பெருவிலை கொடுத்து வாங்கியதாக அறியப்படுகின்றது. Jenni மனதில் தான் எப்போதும் நிலைத்திருக்க வேண்டும் என்று நினைத்திருக்கலாம்...ALL THE BEST CHUA ALIAS SIVA

.

பி.கு. 2: சி(சு)வா, சிவா”ஜி” இருவருக்கும் எனக்கும் எந்த சம்மந்தமும் இல்லை.

.

தொடர்பு பட்ட ஒரு செய்தி: 2009 ல் காதலும் recession ல் இருக்குதாம்.செய்தியைப் பார்க்க

மாதாந்த சிங்கை பதிவர் சந்திப்பு - 14.02.2009

2009-02-11T21:49:00.001+08:00

வணக்கம்...! (இது தலைப்பு செய்திகள் இல்லை)

.

வரும் சனிக்கிழமை 14.02.2009 அன்று பொன்மாலைப் பொழுதாம் 3.30 மணிக்கு நமது மாதாந்த பதிவர் சந்திப்பு சிங்கப்பூரின் அழகுமிகு நீர்த்தேக்கமும் காடும்சேர்ந்த மக்ரிட்சி அணைக்கட்டு (MacRitchie Reservoir) அருகில் நடைபெற உள்ளது.

.

மஞ்சள் வெயில் அழகையும் பசுமையான நீர்த்தேக்கத்தையும், குளுகுளுப்பான காட்டின் அமைதியையும், அபூர்வ பறவைகளின் அழகிய நர்த்தனங்களையும், குரங்குகளின் குசும்பினையும், கூடவே செந்தில் நாதனின் பாகற்காய் அல்வாவையும் நம் பதிவர்களின் மொக்கையுடன் கலந்து ரசிக்க ருசிக்க அனைவரும் வருக வருக என்று வரவேற்கப்படுகின்றனர்.

.

இந்தச் சந்திப்பு காதலர் தின ஸ்பெசல் என்று நினைத்தால் அதற்கு நானோ, இல்லை நமது செயற்குழுவோ பொறுப்பாக முடியாது. காதலர் தினத்தை சாட்டி யாரும் இந்தச் சந்திப்பை புறக்கணிக்க முடியாது.அப்படி ஏதாவது நடந்தால் சிங்கையிலும் உங்கள் வீட்டு பக்கம் ஓட்டோ என்ன.லொறியே வரும். சந்திப்பு வருபவர்களுக்கு சீனப்புத்தாண்டை முன்னிட்டு Hang Paw எனப்படும் கைவிசேடம் எதுவும் வழங்கப்படுமா இல்லை தைப்பூசத்தை முன்னிட்டு (பேர்ஸ்) மொட்டை அடிக்கப்படுமா என்று எல்லாம் இன்னும் முடிவு செய்யப்படவில்லை.

.

நிகழ்ச்சி நிரல்:

3.30 : முதலில் வருபவர்கள் என்னுடன் ஒரு சிற்றுலா சென்று வரலாம்

3.45: மங்கல விளக்கேற்றல்

4.00: வரவேற்புரை: ஸ்ரீலஸ்ரீ யூசுப் பால்ராஜ்

4.10: தீர்த்தமாடல்

4.20: அறிமுக படலங்கள்

5.00: பட்டம் அளிப்பு விழா : கோவியாருக்கு “உலகம் சுற்றும் பதிவர்” பட்டம் வழங்கப்படும்

5.15: வழமையான உரையாடல்கள், படபிடிப்புகள், சிற்றுலாக்கள், விவாதங்கள் (பொருளாதார பிரச்சினை, lay ofஃப் போன்ற அர்த்தம் மிகுந்த தலைப்புகள் மட்டுமே ஏற்றுக் கொள்ளபடும். பதிவர் சந்திப்பு எக்காரணம் கொண்டும் 7 மணிக்கு முன் முடிவடைவது வரவேற்கப்படமாட்டாது)

7.00: முடிவுரை & தேனீர் விருந்து

.

கவனத்துக்கு: சந்திப்பு நடக்க இருப்பது MacRitchie Reservoir க்கு அண்மையில்..ஆகவே இடம் மாறி Seletar, Peirce Reservoir பக்கம் சென்று விடவேண்டாம். விபரங்களுக்கு இங்கே பார்க்கவும்.

கீழ்வரும் பேரூந்துகள் மூலம் இங்கே வரலாம்.

.

52, 74, 93, 130, 132, 156, 157, 162, 165, 166, 167, 852, 855 or 980

.

நான் அடிக்கடி சென்று வந்த இடம் என்பதால் சில படங்களை கூடவே இணைத்துள்ளேன்

.

பிற்குறிப்பு: இந்த இடத்தை தலைகீழாக நின்று (நான் கடவுள் பாணியில்) அடம் பிடித்து தெரிவு செய்தவர் நம் ஜெகதீசன். அவரும் மேலும் சில கமெராக் கவிஞர்களும் சந்திப்பு நேரத்துக்கு முதலே வருகை தர உள்ளனர். நாம் உள்ளே ஒரு சிற்றுலா மேற்கொள்ள உத்தேசித்துள்ளோம்.

.

அனைவரது நல்வரவையும் நாடும்,

.

செயற்குழு

சிங்கைப் பதிவர்கள் முன்னேற்றக் கழகம்

சிங்கப்பூர்

.

தொடர்புகளுக்கு

ஜெகதீசன் - 90026527

ஜோசப் பால்ராஜ்- 93372775

.

நன்றி...

.

விறுவிறுப்பான ஒரு டெனிஸ் ஆட்டம்

2009-02-04T20:18:00.002+08:00

”யுத்தம் தொடங்கி 2 வருடங்களாகி விட்டது. முன்னிலை..சமநிலையாகி இப்போது பின்னிலையில் உள்ளது.”

தொலைக்காட்சியில் டெனிஸ் போட்டி நேரடி ஒளிபரப்பு. முன்னிலை வீரர் ஒருவருடன் கடைநிலை(பின்னிலை) வீரர் ஒருவர் மோதுகிறார். முதல் ஒரு ஆட்டங்களிலும் முன்னிலை ஆட்டக்காரர் இலகுவாக வென்றுவிட, மூன்றாவது ஆட்டம் விறுவிறுப்பாகின்றது. புள்ளிகள்(Score) 6-0, 7-1.

“யுத்தத்தில் அதிகளவு இழப்புகளைச் சந்திப்பது பொதுமக்களே..”

மூன்றவது ஆட்டத்திலும் முன்னிலை வீரரின் கை ஓங்கியிருந்தது. இன்னும் சில நிமிடங்களில் அவர் இந்த ஆட்டத்தில் மட்டுமல்ல, போட்டியிலும் முழு வெற்றி பெற்றுவிடும் நிலையில் உள்ளார்.தாக சாந்திக்காக ஆட்டம் சிறிது இடைநிறுத்தப் படுகின்றது. புள்ளிகள் 3-0

“மக்களின் பாதுகாப்பிற்காக சில மணிநேரங்கள் மோதல் தவிர்ப்பு, இன்னும் சில தினங்களில் நாம் யுத்தத்தில் முழுமையாக வெற்றியடைவோம்..”

யுத்தம் தொடர்ந்தது. ஆட்டமும் தொடங்கியது. புத்துணர்ச்சியுடன் இரு வீரர்களும் களம் இறங்கினர்.வெற்றி எனதே என்ற நம்பிக்கையுடன் முன்னிலை வீரர் ஆட, இதில் வெற்றி பெற்றால் தான் வாழ்வு என்ற நிலையில் கடைநிலை வீரர் போராடத் தொடங்கினார். கடைநிலைவீரரில் ஆட்டத்தில் அனல் பறந்தது. அந்த அனல் முன்னிலை வீரரை களைப்படைய வைக்க, அவர் விட்ட சின்ன தவறுகளை தனக்கு சாதகமாக மாற்ற தொடங்கினார் கடைநிலை ஆட்டக்காரர். புள்ளிகள் 3-1.

“களமுனையில் ஊடறுப்பு தாக்குதல்கள் நடந்தாலும் யுத்தம் தொடரும்”

ஆட்டம் விறுவிறுப்பானது. முன்னிலை வீரரின் பலவீனத்தை சரியாக கணிப்பிட்ட கடைநிலை வீரர் தன் இலாவகமான டெனிஸ் stroke கள் மூலம் முன்னிலை வீரரை மைதானத்தில் அதிக தூரம் ஓட/அலைய வைத்தார். புள்ளிகள் கூடுகின்றன. இப்போது 3-2.

“அகலக் கால் வைப்பதன் மூலம் இழப்புகள் அதிகரிக்கலாம்”

சில நிமிடங்களில் முடிந்துவிடும் என்று எதிர்ப்பார்க்கப்பட்ட ஆட்டம் தொடர்ந்து நீடிக்கின்றது. கிட்டத்தட்ட ஒரு மணி நேரமாகிவிட்டது. கடைநிலை வீரரில் ஆவேசமான ஆட்டத்தை முன்னிலை வீரர் சமாளித்தாலும் ஆட்டம் இப்போது 4-4

“யுத்தம் தொடர்கின்றது. எப்போது முடியும் என்று வரையறுத்துக் கூற முடியாது.”

ஆட்டம் இப்போது Tie-Brake இல்...இதில் முன்னிலை வீரர் வென்றால் முழுவெற்றியும் அவருக்கே. கடைநிலை வீரர் வென்றால் இது அவருக்கு ஒரு மறுவாழ்வு. இன்னும் 2 ஆட்டங்கள் கூடுதலாக கிடைக்கும். சரித்திரத்தைப் புரட்டிப் போடக்கூடிய பொன்னான வாய்ப்பு.

“சரித்திரங்கள் மாறலாம்..நாம் எப்படியும் இந்த யுத்தத்தில் வென்று சமாதானத்தை நிலை நாட்டுவோம்”

மழை பெய்யத் தொடங்கியது. போட்டி சற்றே இடைநிறுத்தப்படுகின்றது. இரு வீரர்களுக்கும் இந்த ஓய்வு தேவைப்படுகின்றது. போட்டி ஆரம்பமாகி கிட்டத்தட்ட 2 மணித்தியாலங்களாகி விட்டது. இன்னமும் முடியவில்லை. டெனிஸ் வரலாற்றில் ஒரு நீண்ட போட்டி.

“பருவ மழை யுத்தகளத்தைப் பாதித்தாலும் யுத்தம் 4 வது வருடமாக தொடர்கின்றது..”

மழை இன்னும் விட்ட பாடில்லை. ஆட்டம் இப்போதைக்கு தொடங்காது போல...நாளைக்கு Highlights ல் இல்லாட்டி செய்தியில் முடிவைப் பார்த்து தெரிஞ்சு கொள்வோம். நிம்மதியில்லாமல் நித்திரையைக் கொள்(ல்)வோம்..

.

(படங்கள் உதவி:BBC இணையம்)

.

மாட்டு(டிய) பகிடிகள்

2009-02-01T22:43:00.001+08:00

தென்காசிப்பட்டணத்தில் வரும் மாட்டு பகிடி அனைவரையும் கவர்ந்த ஒன்று.திரையரங்குகளில் இந்தக் காட்சிகளில் சிரிப்பலை சுனாமி போல் அனைவரையும் தாக்கோ தாக்கு என்று தாக்கியது. அவ்வப்போது தொலைக்காட்சிகளிலும் வந்து வயிற்றையும் வாயையும் பதம் பார்த்து விட்டு செல்லும்.

.

தென்காசிப்பட்டணம்

.

இந்தப் படம் வருவதற்கு முன்பே BBC ஆல் தயாரிக்கப்பட்ட ALLO ALLO (wiki) என்ற தொலைக்காட்சி நகைச்சுவை தொடரிலும் இதே போன்ற ஒரு காட்சி இடம்பெற்றுள்ளது. இந்த நாடகம் 1982-92 களில் வெளிவந்தது. இலங்கையில் 2000 களில் ஒளிபரப்பானது. 2ம் உலக யுத்த காலகட்டத்தில் பிரான்ஸில் ஜேர்மனிய கட்டுப்பாட்டின் கீழ் இருக்கும் ஒரு பிரஞ்ச் கபே ஒனர் சந்திக்கும் சிக்கல்களை சுவாரசியமாக சொல்லும் கதை இது. அந்த கபே ஓனர் பிரிட்டிஷ் ஏஜெண்டுகளுக்காக வேலை செய்கிறார். விமான விபத்தில் சிக்கிய 2 விமான ஓட்டிகள் அவர் வீட்டில் தஞ்சம் அடைய அதனால் அவர் படும் அவஸ்தைகள் பல பல...

.

ALLO ALLO

.

Matrix Cow

2009-01-28T20:24:00.001+08:00

வில்லு படத்தில் வடிவேலு மாட்டிடம் வாங்கிக்கட்டுவதை தொலைக்காட்சியில் பார்த்தேன். அதன் மூலம் இதுதான். 2004 களில் இந்த கிளிப்பை பார்த்ததாக ஞாபகம்.

.

matrix cow

.

வில்லு

.

Jenni மனதில் சிவா

2009-01-26T14:22:00.004+08:00

”மறுபடியும் நேர்முகத்தேர்வுக்கு போன சிவப்பிரகாசம் பிரசாந்தன் எனப்படும் சிவாவிற்கு வேலை கிடைக்காவிட்டாலும் நேர்முகத்தேர்வுக்கு அழைத்த HR Admin Jenni ன் மனதில் இடம் கிடைத்தது..”

.

Jenni ன் மனதில் இடம் பிடித்த சிவாவிற்கு இன்னொரு நிறுவனத்தில் இருந்து நேர்முகத்தேர்வு அழைப்பு வந்தது. நல்லவேளை அங்கே HR Admin அரைக் கிழவியாக இருந்ததால் என்னமோ, 2 நேர்முகத்தேர்வுகளிலும் (HR, Engineering Manager) தேறினான். வேலையிலும் இணைந்தான்.

.

ஒரு வாரம் கடந்தது. தனது Payroll, மற்றும் CPF (ஊழியர் சேமலாப நிதி) சம்மந்தமான ஆவணங்களை சமர்ப்பிக்க, சிவா HR அலுவலகம் சென்றால், அங்கெ இன்ப அதிர்ச்சியாக Jenni.......

.

இவள் எப்படி இங்கே....?

.

“Hey Siva....Nice to see you here...How's the job so far..."

.

"Hey...Ye....Fine...how...." இடைமறித்த Jenni

.

"You wana know how come I was here RIGHT...?"

.

அடடா ஆரம்பிச்சிட்டாளே RIGHT போடிறதுக்கு....

.

“Because I wana be with you ALWAYS..." கண் சிமிட்டினாள்.

.

ஆகா...விடுகதை போல் முடியும் என்று பார்த்தால் இது தொடர்கதையா இழுபடும் போலிருக்கே.

.

“I will join you for lunch later..." தோளில் தட்டிவிட்டு காதில் ஸ்பரிசித்து விட்டு செல்ல சிவாவோ HR அலுவலகம் வந்த வேலையை மறந்து விட்டிருந்தான்.

.

3 மாதங்கள் ஓடின.சிவா, Jenni இருவரும் Prohibition காலம் முடிந்து வேலையில் மட்டுமில்லாமல் காதலிலும் நிரந்தரமாகிவிட்டிருந்தனர். ஒரு நாள் Jenni தனது பாணியில் “If I express my feelings to you, you will understand & accept them, RIGHT...?” என்று சிக்கலாக கேட்க, சிவாவும் சிக்கனமா “Yes" என்று சொல்லிவிட இருவரும் சிக்கென ஓட்டிக்கொண்டு கிக்கான ஜோடியாக உலா வருகின்றனர்...

.

இருவருக்கும், அனைவருக்கும் என் இனிய சீனப்புத்தாண்டு நல் வாழ்த்துகள்...!, Gong Xi Fa Cai..! 恭喜发财...!

.

நேர்முகத் தேர்வுகள்

2009-01-25T00:54:00.001+08:00

.

”Are you willing to give 120 %...?”

.

"Sure. I can promise 1200%...."

.

நேர்முகத்தேர்வு ஒன்றில் கேட்கப் பட்டபோது அருண் அடிச்சு விட்டது. வேலையில் இணைந்தபின் தான் தெரிந்தது 120% என்பது சம்பளம் எதிர்பார்க்காமல் 20% வீதம் அதிக நேரம் வேலை செய்ய வேண்டும் என்பது. பாவம் அருண்..எப்படித்தான் 1100% அதிகமாக உழைக்கப்போறனோ தெரியவில்லை.

...........................................................................................................................

.

"Hey ...Is it Siva......"

.

பெயரை முழுதாக சொல்லி முடிக்க முன்பே சிவப்பிரகாசம் பிரசாந்தன் “Ye..Speaking.."

.

"Hi This is Jenni from ......., you send me an email regarding the interview RIGHT..?"

.

”Ye...I wana...."

.

"Know why you have to come for another interview RIGHT..?"

.

"Ye..Actually....."

.

"Ye Siva..You have to come for another Interview as it's mentioned in the mail..."

.

"thats what I wana....."

.

"Know why RIGHT...? Well Siva. Our managers think that you have right skills, and expereinces to join and work in this company. We like to have young, passionate, and energetic guys like you to join our company.."

.

உச்சி குளிர்ந்த சிவா..”Thanks..But.."

.

"Wana know why RIGHT..?"

.

சிவா ஏதும் சொல்ல முன்...

.

"Because the other managers also interested in your resume, so they wana interview you also..."

.

".............."

.

என்ன இது பழகிப்பார்க்கிறாங்களா...?

.

மறுபடியும் நேர்முகத்தேர்வுக்கு போன சிவப்பிரகாசம் பிரசாந்தன் எனப்படும் சிவாவிற்கு வேலை கிடைக்காவிட்டாலும், நேர்முகத்தேர்வுக்கு அழைத்த HR Admin Jenni ன் மனதில் இடம் கிடைத்தது..

.

க(கா)ம‘ரா’

2009-01-22T20:15:00.001+08:00

.

Mc-Ritche Reservoir, சனிக்கிழமை, பொன்மாலைப் பொழுது

.

ராபின் தன் இனிய பொன் ‘நிலா” வுடன் கிட்டார் இசைத்துக்கொண்டிருந்தான். வார விடுமுறை அவனைப் போல் பலரையும் இந்த இயற்கை அழகு கொஞ்சும் இடத்துக்கு அழைத்து வந்திருந்தது. இளஞ்சிவப்பு கால்களை உடைய நாராய்கள் நீர்த்தேக்கத்தில் வந்து இறங்கத் தொடங்கியிருந்தன.

.

ராபின் தன் பின்னால் இருந்த ஒருவர் நெடுநேரமாக படம் எடுப்பதை கவனித்தான். சந்தேகம் வலுத்தது..அப்படி இருக்குமோ..? எதுக்கும் கேட்டு விடலாம் என்று முகத்தை விறைப்பாக்கிக்கொண்டு அந்த கமெரா இளைஞர் முன்னே போய்..

.

“Excuse Me.."

.

கமெராவில் இருந்து முகத்தை எடுத்த அவர்..”Yes..?"

.

”Well..Can I have a look at your shots...?"

.

"Sure..."

.

அவரிடம் இருந்து அந்த NIKON D40X கமெராவை வாங்கிய ராபின் பட்டனை Display mode க்கு தட்டி எடுக்கப் பட்ட படங்களை ஒவ்வொன்றாக தேடியபோது...

.

அந்திமாலைப் பொழுது, அழகிய நீர்த்தேக்கம், மரங்கள், நீர்த்தேக்கத்தில் விழுந்த நிழல்கள் என்று வழமையான இயற்கைக் காட்சிகள் அடங்கிய படங்களுடன்....

.

இளஞ்சிவப்பு கால்களை உடைய நாராய் நீர்த்தேக்கத்தின் கரையோரம் நடந்து திரியும் காட்சிகள் மட்டுமே இருக்க...

.

புன்னகைத்த ராபின்...”Nice shots, BTW I'm Robin. You are..?"

.

"Rajesh..."

.

இருவரும் கைகுலுக்கி, செல்பேசி எண்களை பரிமாறிக்கொண்டு விடைபெற்றனர்.

.

நீர்த்தேக்கத்தின் மறுகரையில் இன்னும் அந்த இளஞ்சிவப்பு கால்களை உடைய நாராய் அழகு நடை நடந்து கொண்டிருந்தது. கூடவே இளஞ்சிவப்பு கால் நாராய்க்கு போட்டியாக இளஞ்சிவப்பு காலணி அணிந்த அழகுபதுமை..ஒன்றும் நடந்து கொண்டிருந்தது.

.

ராஜேஷின் கமெரா இயங்கத் தொடங்கியது. ரொபினும் அதனை அவதானிக்கத் தொடங்கியிருந்தான்.

.